zazaki.net
28 Adare 2024 Panşeme
Girdîya Karakteran : 12 Punto 14 Punto 16 Punto 18 Punto
23 Sibate 2010 Sêşeme 09:48

Yew Hîkayeya Roşan Lezgînî Bîye Fîlm

[Xebere]
AKnews

Hîkayeya cinîyêka kurde ke mêrdeyê aye netîceyê cînayetanê kerdoxê xo meçhûl de kişîyayo bîye fîlm. Fîlm qezaya Çewlîgî Bongilane dewa Qeran de ancîyayo û nameyê xo “Baba” yo. Domana ke babîyê aye kişîyayo, dadîya xo ra persena vana “Babê mi key yeno?” Fîlmo ke 12 deqîqeyî yo, bi na perse dest pêbeno û dramê domana ke sêwî menda û cinîya ke vîya menda qal keno.

Rejîsorê fîlmî Mehemed Alî Konar 27 serre yo, qismê Rojnamegerî, Sînema û Televîzyonî yê Unîversîteyê Marmara (Marmara Üniversitesi Gazetecilik Sinema Televizyon Bölümü) ra mezun bîyo û demeyêk şaristanê RomaÎtalya de perwerdeyê sînema dîyo.

Welatê kurdan de bi deshezaran cînayetê kerdoxê xo meçhûlî estê. No fîlm badê kiştişê babî dramê cinî û psîkolojîya domane ra yew fotograf nîşan dano. Hîkayeya fîlmî kitabê şaîr û nuştoxo kurd Roşan Lezgînî “Binê Dara Valêre de” hîkayeya nameyê xo “Baba” ra gêrîyaya û bi eynî nameyî bîya fîlm. Fîlm de psîkolojîyê yew domana (tuta) ke babîyê aye cînayetêkê kerdoxê xo meçhûl de kişîyayo û dadîya aye seba ke psîkolojîyê domana xo bipawo, kiştişê babî senî aye ra nimnena, nîşan dano.

Rejîsoro ciwan Mehemed Alî Konarî derheqê fîlmê xo de wina malumat da AKnewsî:

“Fîlm de eşkera yo ke 'babî' hetê kesanê meçhûlan ra kişîyayo. Gama ke kêneka qijkeke persê hewalê babîyê xo kena, dadî wazena bi lûrîgan cewab bido. Esas dadî hem wazena kêneke pênêhesîyo hem zî wazena bi lûrîgan xo û domana xo pîya teselî bikero, zerrî bido xo ver. Dadî lûrîganê xo de bi hawayêko muphem behsê cînayetêkê polîtîkî kena. Her kes nê gunekarîyan ra xeberdar o.”

Rejîsor Mehemed Alî Konar seba fîlmê xo vano, “No tena yew destpêk o.” Û ser o zêdneno vano, senî ke firsend bikewo destê mi ez kirdkî de hîna zaf fîlman ancena.

Fîlm de Roza Erdem, Hêlîn Bulut, Kekê Yildirim û Tajdîn Gultekîn kaykenê. Muzîkê fîlmî hetê Metîn Kemal Kahramanî ra virazîyayo. Fîlm de dîyalogî bi kirdkî (zazakî) yê la binnuşteyî cîya-cîya bi tirkî û îngilîzkî amade bîyê. Fîlm seba festîvalan şawîyayo bi Îtalya, Îngilîstan û Fransa. 

Seba temaşekerdişê fîlm ra yew fragmanî bitikne>>>

_____________

Çime: http://www.aknews.com/tr/aknews/1/117594/

Na xebere 3363 rey wanîyaya
ŞÎROVEYÎ
Bu tür seneryolarla insanları kandırmayın
Abraham Zaryan
Eke ti şîroveyê xo de rasterast yan zî sergirewte heqaret ro kesêk yan bawerî û mîlîyetê merdiman bikerî yan zî şîroveyê xo heme bi HERFANÊ GIRDAN û teberê qaydeyanê rastnuştişî de binusî, nêweşanîyeno!
05 Adare 2010 Îne 17:37
Serhat
Serhat Amed
Ez to firaz kena rêzdar Roşan Lezgîn û aê ke ena verheme to kerdo kilm fîlme ez îne zî firaz kena. Ena xebate semedê laver şîyayîş û nas kerdişê lehçey Zazakî mihîma. Ez xebatanê şimayê newande şimarê serkewtiş wazena.
24 Sibate 2010 Çarşeme 13:10
çir
nihad
mi temaşe kerd. gelek kêfweşbîya. bimanî çiman ser
23 Sibate 2010 Sêşeme 22:04