Erxenî de û Diyarbekir de fuarê kitabanê Kurdî

Enê rojan ma sey Weşanxaneyê Roşna beşdarê di fuaran biyî. Fuara verîne Beledîyeya Erxenî û Eğitim-Senê Erxenî rojanê 2-5 gulanî de Erxenî de viraşte. Fuara diyine zî, Beledîyeya Pîle ya Diyarbekirî û Komeleya Weşangeranê Kurdan rojanê 27 gulan-1 hezîranî de bi minasebetê ‘15ê Gulanî Roşanê Ziwanê Kurdî’, sey ‘Rojê Kitabanê Kurdî’ Diyarbekir de viraşte. Berê Koyî de, Meydanê Şêx Seîdî de viraştişê fuara kitabanê Kurdî semedê ma kurdan yew mehnaya xwu ya xisûsî estbî. Her di fuaran de zî hema vajêne ke tenya weşanxaneyê ma kurdan beşdar bibî. Her di zî aktîvîteyê mitewazî bî; seba ke standê weşanxaneyan binê konan de bî, coka mi xwu dezgeyê îşporta de hîs kerd. Ez Beledîyeya Erxenî û Eğitim-Senê Erxenî rê, Beledîyeya Diyarbekirî û YewKurdî rê zaf sipas kena.

Fuara Erxenî de zî fuara Diyarbekirî de zî, sere de ez bêzerrî biya. Mi va belkî eleqe tay bo, mi nêwaşt ez beşdar bibî. La her di fuaran de zî heval û hogiran sere na mi ser. Mesela, Mehmeşa xoce bi xwu ame, kitabê ma bi erebaya xwu berdî Erxenî. Ancî zî ez bêzerrî şiya la gereka ez îtîraf bikerî ke ez her di fuaran ra zaf keyfweş ageyraya. Çimkî xisûsen kitabanê mi rê yew eleqeyo zaf zêde estbi, ez vana qey 300 hebî ra vêşêr tenya kitabê mi roşîyayî. Kitabê mi, di hebî Kurmancî di hebî Tirkî, êyê bînî pêro Zazakî yê. Her şeş kitabê min ê hîkayeyan û ferhengî zaf eleqe dî. Mehmeşa xoceyî û Alî Fuad xoceyî ez tenya nêverdaya. Diyarbekir de, xwura Jîyan panc rojî mi dir bi. Berdiş û ardişê kitaban de Hebûnî xizmet kerd. Ez hemîne rê zaf spas kena…

Erxenî de, roja verîne şilî bî, ma qasê saetêk stand de mendî. Roja peyîne zî ez nêşiya. Yanî ma tenya hîrê rojî stand akerd. La enê hîrê rojî qelebalix û zaf weş vîyartî. Gelek heval û hogirî ameyî standê ma. Mi Erxenî de gelek mialimê kurdperwerî şinasnayî, înan yew eleqeyo zaf baş nîşanê şexsê mi zî nîşanê kitabanê mi zî da. Mi zaf wendoxê neweyî şinasnayî. Ez wazena tiya de tenya behsê yewî bikerî. Roja diyê fuare bî, o û hevala xwu gama ke verê standê ma ra vîyarenê, qey vengê suhbetê ma yê bi Zazakî şinawenê. Vindertî û bi Tirkî mi ra persayî, va “Gelo bi Zazakî zî kitabî nusîyayê?” Ena perse ser o mi kitabê ma yê Zazakî nîşan dayî û mi va “Panc sey ra vêşêr kitabê ke bi Zazakî nusîyayê estê.” Zaf keyfê înan ame, zaf şa biyî. Eslê xwu şarê Mehdenî bî, la heta a game nêşinawitbi ke bi Zazakî zî kitabî nusîyayê. Mi hema payanî ra herfê alfabeya ma mûsnayî înan. Kitabê mi Toplumsal Kürt Gruplarından Zazalar û çend hebî kitabê min ê hîkayeyan erînayî. Sey enê mialiman, gelek wendekarê lîse zî raştê mi ameyî ke hema newe şinawitêne bi Zazakî kitabî estê.

Fuara Diyarbekirî de zî gelek wendoxê neweyî ameyî standê ma. Mesela, xortêk ame, mi ra va “Kitabê Roşan Lezgînî Binê Dara Valêre de şima het esto?” Mi kitab da ci. Bala xwu da kitabanê bînan ser, kitabê min ê hîkayeyan ê bînî zî erînayî. Mi va “Ti Roşan Lezgînî şinasnenê?” Va “Nê.” Û dewam kerd va “La mi şinawito, vanê Zazakî zaf weş nusneno…” Mi vengê xwu nêkerd, ez tenya peşmirîyaya.

Panc rojanê fuara Diyarbekirî de gelek heval û hogirî, gelek wendoxê neweyî ameyî standê ma, ma zafine dir suhbet kerd. La tiya de ez wazena behsê çend kesan bikerî. Roja çarê fuare de ameyî. Înan ez şinasnayne la mi hema newe ê dîyêne. Înan zafê kitabê mi wendbî. Êyê ke hema nêwendbî zî fuare de erînayî. Miyanê suhbetî de înan bi xwu va “Ziwanê to zaf fesîh û zelal o. Ti ruhê Zazakî gore nusnenê. Ma edebîyatê to ra keyf gênê…” Înan nameyê yewî zî da, la ez tiya de neqil nêkerî. Va “Ey Zazakî de ruh nêverdayo, yew ziwano naylon viraşto…” Mi tenya xwu rê goşdarî kerd. Labelê seba ke înan enê çiyî ferq kerdbî, tesbît kerdbî û raşteraşt îfade kerdêne, ez xwu zere de zaf şa biya, coka mi waşt ez tiya de zî neqil bikerî. Kam enê çiyî senî fam keno wa bikero, la mi eno fam kerd: pakîtî, bi yew hawayo mehsûm xwu yew dehwaya heqîqî rê weqif kerdiş, bi zanayiş xebata raşte, keda helale, eserê baş û kalîteyinî sey zerrnî yê, ewro bo yan siba bo, miheqeq erjo ke heq kenê vînenê.

Ez her di fuaran de zî rincan biya, la ez zaf şa biya. Ez bi yew moralo berz û yew zerrîya musterihe ageyraya. Ez heme wendoxan û elqedaran rê zaf sipas kena.