zazaki.net
15 Kanûne 2018 Şeme
Girdîya Karakteran : 12 Punto 14 Punto 16 Punto 18 Punto
15 Teşrîne 2018 Panşeme 09:27

Şewçila-16 Şî Metbea

Şewçila erey bimano zî, hende muhîm nîyo. Çimkî ma rê çiyo esas, edebîyatê ma de zêdîyayişo bikalîte û averşiyayiş o…

Hûmara 16. ya kovara edebî hunerî Şewçila şî metbea.

Hûmara 15. yê Şewçila par payizî vejîyaybî. Meşgulîyet ra, hîna zaf zî amadekerdişê kitabê ke Weşanxaneyê Roşna ra weşanîyenê ver, ma ta nêameyî dosyaya şîyesine amade bikin. Erey bimano zî, hende muhîm nîyo. Çimkî ma rê çiyo esas, edebîyatê ma de zêdîyayişo bikalîte û averşiyayiş o…

Ena hûmara Şewçila de yew nuşteyo muhîm yê edîb û roşinbîro spanyol Juan Gotisoloyî (1931-2017) esto, “wendiş û newe ra-wendiş”ê metnanê edebî ser o nuşto. Murad Canşadî derheqê orîjînalîya Mem û Zîna Ehmedî Xanî de nuşto û sey esero pêarde têkilîya Mem û Zîne û destanê gelêrî Memê Alanî piya munaqeşe keno. Bîlal Zîlanî heyat û şiîranê Mela Mehmedê Nêribî ser o nuşto. Nûrî Keleşî zî “Sanikê Hezar û Yew Şewe” de rêça kurdan teqîb kerda.

Ekolê realîzmê efsûnî (fr. réalisme magique, tr. büyülü gerçekçilik) yê edebîyatê Amerîkaya Latîne ra di hîkayeyê Jorge Luis Borgesî (1899-1968) bi nameyê “Xincere” û "Hîkayeya Rosendo Juárezî”, edebîyatê kirîvanê ma arminîyan ra zî yew hîkayeya Hagop Mintzurî (1886-1978) “Herê Mela Umerî” ena hûmare de weşanîyayê.

Edebîyata ma ra, hîkayeyê neweyî zî enê yê: Huseyîn Karakaşî ra hîkayeya “Verê Lojine de”, Roşan Lezgînî ra “Hîkayeya Dengbêjêkê Kurdî: Zeryab”, Îsmet Borî ra “Cuya Bimana û Bêmana” û “Areqê çareyî”, Îdrîs Yazarî ra “Hîkayeya Arîya” û Huseyîn Çakanî ra “Herre rê Mektûb” ena hûmare de estê.

Şiîrê ena hûmare zî wina yê: Mela Mehmedê Nêribî ra “Beytay Eşqî”, Havîn Acar ra “Welat ra Dûrî”, Dilo Bargiranî ra “Birênî”, Canê Dilo ra “Nalayişê Ruhê Bêkesî”, Çilkanî Ulyanî ra “Welat ho Paweyê Ma” û Sîyamend Mîrvanî ra “Rîşa Qewmê Ma” ena hûmara de ca girewtê.

Yew kovara edebî hunerî de ancax hende eserê neweyî bibê. Înşalah nizdî ra metbea ra vejyena û edebîyatê ma bineyna kena dewlemend. Edîbê ma, wa seba hûmara 17. eseranê xwu amade bikerê.  

   

Na xebere 654 rey wanîyaya
No nuşte hema şîrove nêbîyo.