Micadeleyê Dersa Kurdî - I

Ez û Bro çend serrî yo ke ma seba dersa weçînite ya ziwanê Kurdî rayan de yê. Nê, Bro, însan nîyo, o nameyê erebaya min o: Clioya sipî, 8 serrî de 162.000 kîlometreyî kerdê.

Rayan de her roje duayî fekê mi de zêdiyenê. Ez dua û siyaset mûsena, la senî?

Mesela, temûzê 2024î de ez kewta raya Sêwasî. Qezayanê enê wîlayetî ra Qengal, Xefik, Îmranlî û Zara heme kurmanc û zaza yê. Zafê înan zî Elewî yê la tayê zî kurdê Sunnî yê.

Ez wazena qezaya Zara ser o çend qalan vacî. Mi uca midûrê Milli Eğitimî yanî îdarekerdox û mesûlê mektebanê qezaya Zara ziyaret kerd.

Odaya midûrî zey ocaxa tirkanê neteweperestan ameybî xemelnayiş. Yew goşe de heykelê Asena estbi, verg xwura sembolê ulkucîyan o. Hetê peyê meqamê midûrî de zî heme beyraqê tirkan aleqnaye bî.

Midûr meqamê xwu ra wurişt ame leyê mi de nişt ro. Seba burokratan meqam ra wuriştiş zehmet o, meqam îqtîdar o. Eke wurişt ame leyê to de nişt ro, mehnaya enê hurmet nîşandayiş o.

Mi rê sodaya sade û qehwe waşt û mi dest bi vatişê sebebê ziyaretê xwu kerd. Senî ke cumleya “Çewlig ra seba ziwanê Kurdî” mi fek ra vecîya, midûrî va “Mi rê Kurdî-mirdî behs mekere, seba mi yew ziwan esto, yew dewlete esta.”

Mi zî tesdîq kerd, mi va “Midûrê mi, seba mi zî wina yo, la projeksîyonê dewletanê bînan yê sed seran esto.” Tekrar qala mi birna, va “Ti Çewlîg ra yê?” Mi va “Eya.” Va “Serra 1979 de uca serokê beledîye ke endamê MHP bi ame kiştiş, serokê şaxê bajarî yê Milliyetçi Hareket Partisi bi.” Mi va “Eya, ez nika beşê Zazakî de yew eqrabaya ê serokî dir dersa weçînite ya ziwanê Kurdî ser o şixulîyena.”

Va “To hişê mi da têmiyan ro.” Û yew midûrî rê telefon kerd. O midûr yew zazayo Elewî bi, nameyê ci Huseyn bi. Midûrî semedê mi ey ra va “Mamosta Çewlîg ra kewto raye seba dersa weçînite ya ziwanê Kurdî ameyo Sêwas.”

Mi mesela îzah kerde, ma îstîşare kerd. La temûz û tebaxê 2025î wîlayetê Sêwasî de çi heyf ke kesî dersa weçînita ya Kurdî tercîh nêkerda, coka tek yew kadroya mialimtîya ziwanê Kurdî zî texsîs nêbiya.

Raşta ci, semedê ma enda dersa weçînite ya Kurdî sey melhemî ya. Firsetê îstîşare û dîplomasî dana ma. Sebir û Ezîmelah!...