The First Date of Dixtor û Hemşîre

-Nêweşxane ra zaf wext nêmaneno la fina zî ez şina kurs...

-Kursê çî? Înglîzî?

-Nê, dans. Çaça...

-Ça?

-Amerîkaya Latîn...

-Aa, çi weş... (Ez zî esmer a, porê mi sipsiya yo.)

-Ez hema hema her roce şina spor zî. Bi dumbellanê vîst kîloyan bîcepsan, trîcepsan dana xebitnayiş...

-Hmmm... (Ez zî derg û barî ya: 1.71)

-Hewte de hîrê rey zî asnawe...

-Çi weş... (Ez zî werdanê zaf weşan pewjena.)

-Fakulte de zî ez kluba tîyatroyî de biya... Sophocles... Mi rolê Orestesî kaykerd, birayê Electraye...

-Zaf weş o... (Eke ma bizewicî ez zî do di qican biyarî, hende bes o.)

-Ez alto flute cenena...

-Çi weş o... (Eke ma bizewicîyê, ez nêverdana qedehê to bibo veng, panc deqayan ra reyêk ez do çaya to dekerî.)

-Sînema de favorîyê mi Haneke yo. La Bergman zî hosta yo, ez înkar nêkena.

-E... (Şutiş û utîkerdişê kincanê to ra zî do çiyêk kêm nebo.)

-Mi behsê keyeyê xwu nêkerd. Pîyê mi meraqdarê motoran o. Harley-Davidsonekoyê ey esto.

-Rind o… (Zey Massey Ferguson?)

-Maya mi zî açarnayox a. Îspanyolî ra...

-Aaa… (Kurmancî û Kirmanckî?)

-Êê, mi zaf qisey kerd. Nika zî ti kerem bike...

-Aaaeeuu… Nê, ti çiyanê zaf weşan kenê... Ez zî... (Ez heta nika mekteb ra teber nêşîya cayêk... Mi bê fîlmê ke televîzyone de vecîyenê, çiyek temaşe nêkerdo. Yaw heqeten mi qey tebayêk nêkerd?!)