ROYÊ MÎRVANÎ

I
Royê Mîrvanî, ey Royê Mîrvanî

Warê to Koyo Sipî yo; sere sipî yo

To rê biyo rayir, to rê biyo ban

Pîzeyê xwu to rê akerdo, piragirewto kefen

To rê biyo embar, to rê biyo çime

To rê biyo cûye, to rê biyo gan

Koyo Sipî, taca sereyê to yo

Hewrê ci to ser ra xemgîn

Hewrê siyayî, adirîn

Bêrîya deryayî kenê

Geyrenê Royê Mîrvanî

Çimê to hesirin, avzê kenê

Dalpa bi dalpa çilkenê cila to ser

II

Ax Royê Mîrvanî, ax!

Yew pêl gineno to ro, ti herekîyenê

Herekîyenê Hênîyo Sipî ra, Hênîyê Gerrî ra

Dalpa bi dalpa, nazdar nazdar

Neselîyenê Koyo Sipî ra

Kerkûran ser ra, hêlingan ser ra, ribeysan ser ra

Ti binê herrî ra zimenê

Lemê Edî ra, Kûrê Hecî Elî ra

Zîyara Sipî ra, Hênîyo Sipî ra

Mergê Mehmûdan ra xwu aguznenê

Wareyê Cubêrî ra, Hênîyê Qîzan ra

Afire ra, Siwe ra, Hênîyê Gelîyan ra

Layê Merzîlî ra, Layê Gaharî ra

Layê Geytî, Çimeyê La û Nîmla

Eke bi wesar, hêz danê to

Layê Sayêre, Wişkila

Ti paştî gênê qîlan ra, wareyan ra

Warê Mezgêtî ra, Wareyê Heyderî ra

Dilave ra, Hurmin ra, Cubêr ra, Wareyê Kepire ra

Wareyê Qûmî ra, Wareyê Fate ra, Wareyo Bejî ra

Vanka Hîra ra, Kerreyo Qirêfin ra

Kerreyê Pêrtî ra, Vîyê Welaran ra

III

Ti Koyo Sipî ra naselîyenê, yenê war ey Mîrvan

Xorinîya Zixirî ra herikîyenê

Reyanê azgelêran û loxpîran maçî kenê

Reyanê gendaran, wişkdaran, zadiran…

Ti vîyarenê şîpan ra, çirran ra

Simaqin ra, binê Kerreyê Esparî ra

Ca bi ca miyanê tehtan ra vîyarenê

Fetle danê xwu, hokan xwu dima verdenê

Barê xwu kenê giran, hêdî hêdî leqenê

Boya naşînge, zehter û pûneyî xwu dir anê

Natûwetê xwu kesk û kewe de xemelnenê

Bi remal qeraxanê xwu remelnenê

Barê xwu fînenê, xwu kenê sivik

Xwu dima yew erdo axpîn verdanê

Û dormalê xwu de bereket vila kenê

IV

Mîrvan! Eke bi wesar, ti benê har

Benê hêrsin, ser de şinê

Kerreyan xwu dir anê, gwîn qelebnenê

Çiyêk nêeşkeno to ver ra vindero

Ti daran bin ra wekenê, bendan rijnenê

Ca bi ca tûrê xarbêran kenê keman

Tereşnenê reyanê dilbêran

Miyanê deştekan ra, binê dewan ra

Vîyerenê Gola Qerebegan ra

Xwu resnenê Royê Tirmale

Benê yew gan, benê têmiyan

Vîyarenê Zixirê Bîrige ra

Xwu resnenê Çemê Dîcle

Û awbendan de pêl danê xwu ro

Dewan ra, bajaran ra

Sîneyê deştan ra vîyerenê…

Axirî, xwu resnenê Şettê Ereban, rişîyenê Besra

Benê helmê dinya, benê Derya…

Miyaran, 02.04.2025