Haya to mi çinî ya

XERÎBZEMAN

HAYA TO MI ÇINÎ YA

Ez aşiqê to yo
Haya to mi çinî ya
Serê kuçeyê şima de ez pîr bîyo
Binê varanî de ez pûç bîyo
Şewî vîyarenî
Rojî vîyarenî
Çimê mi ha to de yî
Ez kor bîyo
Haya to mi çinî ya

Dinya û alem bi eşqê mi hesîya
Dar û birr, kerra û kuç mi rê bermayî
Meydarî, mi meyxanan ra fetelnayî
Gedeyî, kewtî mi dima, pê mi huyayî
Cenîyî vatvatoxî, leqmatîkî mi ra nayî
Ez nan û awe ra biryayo
Bîyo sey mumê qendîlî
Ti çend qetrehm a
La qey?
Haya to mi çinî ya

Teyran ziwanê mi werdo
Ez nêeşkeno xo eşkera biko
Çimanê to de germinîya rojî esta
La ez nêeşkeno biewnîyo înan ra
Porê to, vayî de kay keno
Zerrîya mi, mi wena
Destê mi kilm î, ez denêreseno
Ena tenganî mi rê barêko giran a
Milê mi kewto
Ez quliz bîyo
Haya to mi çinî ya