Ap Hus û Kênayê Dîyarbekirî

Kênaya Ap Husê Keyê Hesan Dîyarbekir de zewijnaya ya. Ap Hus ge-ge yeno Dîyarbekir, çend rojî keyê kêna de maneno.

Dikanê zamayê Ap Husî semtê Ofîse de yo. Rojêk Ap Hus werzeno şino dikanê zamayî, teber ra, vernîya dikanî de sendelî ser o ronişeno û temaşeyê ameyîş û şîyayîşê şarî keno.

Dîyarbekir de semto tewr luks Ofîs a. Kênayê tewr rindekî yê Dîyarbekirî semtê Ofîse de yê. Ap Hus ewnêno, kênayê rindekî nat ra şinê, wet ra yenê. Ver ra, pey ra, kîştan ra ewnêno; por, rî, lewî, çimî, sêne, mîyane, hêtî… zaf rindek ê.

Ap Hus kam hetî ser ewnêno, kêna yê. Û heme zî rindek ê. Porkejî, porsûrî, porsîyayî.

Ap Hus fetilêno zamayî ser, vano:

- Ero zama, nê gawirbabî şewe şinê kotî şewe?