Yaşam Radyo de Programê Kirdkî (Zazakî)

Programê kirdkî (zazakî) Zerduştname Yaşam Radyo de dest bi weşane kerd. Yaşam Radyo Îstanbul de pêla FM 89.4 ser o, bi ziwananê sey tirkî, kurdkî (kurmanckî, kirdkî/zazakî), armenîkî, lazkî û çend ziwananê bînan weşane keno. Merdim şêno tora Înternetî ser o, adresa www.yasamradyo.com.tr de zî bigoşdaro.

Programê Zerduştnameyî programêko kulturî yo. Hetê Zerduşt Pîranijî ra amade beno û bi hawayêko zindî pêşkêş beno. Program de muzîkê kirdkî cenîyêno, sey portre bîyografîya nuştoxanê kirdan dîyêna şinasnayîş, şîîran û eseranê înan ra pasajî yenê wendiş.

Her program de cematê kirdan (kurdanê zazayan) ra kesêk beno mêmanê programê Zerduştnameyî.

Programê Zerduştnameyî roja şeme (cumartesi) bi saeta Tirkîya saete 20.00 dest pêbeno, hetanî saete 21.00 dewam keno. Roja bîne, yanî roja yewşeme (pazar) saete 14.00-15.00 de tekrarê programî weşanîyeno.