zazaki.net
28 Adare 2024 Panşeme
Girdîya Karakteran : 12 Punto 14 Punto 16 Punto 18 Punto
21 Oktobre 2010 Panşeme 20:51

Xelata Nobelî ya Aştîye yê Liu Xiaoboyî ya

Xebere: Zazakî.Net

Xelata Nobelî ya Aştîye yê serra 2010î yê Liu Xiaoboyî ya. Liu Xiaobo (Liû Gzîaobo) yew aktîvîstê Çînî yê heqanê merdiman o. Goreyê komîteya xelatan a Nobelî semedê kar û mucadeleyê ey ra xelata aştîye dîyaya bi ey.

Liu Xiaobo nêzdîyê serrêk o ke Çîn de hepsxane de yo. Ey derheqê rewşa heqanê merdiman ya welatê xo ser o xeylê meqale û nuşteyî nuştê.

Liu Xiaobo verî ke bêro girewtene manîfestoyêkê sîyasî ser o xebitîyayêne. Ey manîfestoyê xo de reformê sîyasî, demokrasî, zafhûmarîya partîyan û azadîya xo îfadekerdişî teleb kerdêne. La par aşma kanûne de gêrîya û mehkeme 11 serrî ceza da bi ey. Liu Xiaobo verê cû zî, serra 1989 de, gama ke Meydanê Tiananmenî yê Pekînî de serewedartiş virazîya de gêrîyabi û heps de mendbi.

Dayîşê xelata aştîye de çîyo tewr balkêş no yo ke na xebere Çîn de qedexe bîya. Goreyê malumatanê ke cinîya Liu Xiaoboyî dana, o hîna zî pênêhesîyayo ke ey Xelata Nobelî ya Aştîye girewta.

Na xebere 2481 rey wanîyaya
No nuşte hema şîrove nêbîyo.