zazaki.net
29 Adare 2024 Îne
Girdîya Karakteran : 12 Punto 14 Punto 16 Punto 18 Punto
05 Adare 2011 Şeme 11:14

Wextê Karitişê Daran Dest Pêkerd

Xebere: Zazakî.Net

Welat de wextê karitişê daran dest pêkerd. Êdî her roje bi seyan şaxê daran roşîyênê.

Dîyarbekir de peynîya menga sibate de wextê karitişê daran dest pêkeno. Dorê rayîran de, bitaybetî mîyanê Seyrantepe û Rezan de, qeraxê asfaltî de şitlê daran ke hetê Bursa, Yalova û Îzmîr ra dîyenê ardene, yenê rotene.

Goreyê malumatê ke rotoxanê şitlan ra Şukrîyê Mehme Elî day, na merhele de leyê meyweyan yenê rotene. Bazarê rotişê leyan dest pêkerdo û roje bi seyan leyî yenê rotene.

Şukrîyê Mehme Elî ke bi eslê xo dewa Bawan yê Dara Hênî ra û eşîra Botîyan ra yo, vano: “Kesê ke nê doran leyê daran roşenê zafê înan şarê hetê ma yê. Ma dezayê yewbînan ê. Ma şinê hetê Îzmîr, Bursa yan Yalova ra nê leyan anê. Nika hîna vêşî meyweyêrî roşîyênê. Hebê leya meyweyêran 5 TL ra roşîyêna. Dîyarbekir de tewr vêşî mişmişêrî, sayêrî, tuyêrî, bîyokêrî, gozêrî, murîyêrî, murîyêran de yê hamnane û yê payîze estê, hewna, erugêrî, vîşneyêrî, gilyazêrî, hinarêrî û încilêrî roşîyênê. Leyê meyweyêran heme tehmnaye yê. Şarê ma zaf leyan erîneno.”

Rotoxê daran Şukrîyê Mehme Elî vano: “Leyê çamêran vay ê. 20 TL ra dest pêkenê hetanî 300-400 TL zî estê. Tewir bi tewir çamêrî estê. Mesela leylanîyê zerdî, yê menewşî estê. Selwîyê keweyî estê, yê leymûnênî estê, yê mazîyênî estê. Çamêrê Anqara, çamêrê Îranî estê. Çeşîdê çamêran zaf ê. Hewna leylaqêrî estê, çeşîdê valêran zî zaf ê. Û aqasyayêrî estê, çeşîdê aqasyayêran zî estê. Mesela aqasyayêra topike esta.”

Şukrîyê Mehme Elî vano: “Destpêk de leyê meyweyan roşîyênê. Dima darê xemlî yê ke meywe nêgênê, roşîyênê. Eke wisar ame, na rey gul û vilî, nebatê peyzajî roşîyênê.”

Wina aseno ke Dîyarbekir de rotişê daran zî êdî bîyo sey yew sektorî. Kaleka rayîran de naylon ra holikan virazenê. Tede soba ronanê. Çaya xo girênenê û pabeyê muşterîyan vindenê.

Dar û ber xemlê welatî yê, weşîkî û rindekîya tebîetî yê. Wina aseno ke şarê ma êdî qedrê daran zano. Dewan de êdî awe ancîyaya zereyê keyeyan. Dewijan banê neweyî beton ra viraştê. Verê her banî de çend darê meyweyan karitê. Dorê keyeyan şên beno, dewî şên benê, welat şên beno.

Na xebere 3302 rey wanîyaya
ŞÎROVEYÎ
Holike
Rojhat
Mamosta heyran ma na holika ke ti gureneni ma ne kona kurmanci û çadira tirki ya gelo?zehf selami...
11 Adare 2011 Îne 02:40
Wesar to rê veng dano !
Avedîs Darahênî
Wesare ameya koye welate mi. Rayiran bîy yew kişte. Wextê verojî ya. Verojî sîya bîy. Daran pîng kerdî yê. Mirçikî ameyê Welate xo. Hewranê sîya vila bîye. Şox şoxa çeme Muradî ya.
Sey vila wesarî to zî ping bike! Emserr omidê mi esto. Ganî to emserr hîşyar bibî. To zi agere welatê xo. Wayirê ziwanî xo bivece sey verênan. Semedê ziwanê xo Şex Seîd, Feqî Hesen, Seyîd Riza, Alî Şêr… heme sereyê xo da bîy.

Agere eslê xo !
Agere ke, ziwanê to ke bi hezar serran pay de vinderto wa bicîwî yo.
Eke to wazenî bi xo, sey xo bimane…
05 Adare 2011 Şeme 21:39