29 Kanûne 2010 Çarşeme 11:58

Welhasil Îraq de Hukmat Ronîya!

Peynîya peyêne de Nûrî el-Malikî hewna wezîfeyê serekwezîrîye girewt û kabîneya hukmatê neweyî rona û meclise ra ray girewt

Badê 10 aşman ke Îraq de wçînayîş virazîyayo, axir bi çi kul ûl halî hukmat ronîya.

Îraq de roja 7 adare 2010 de weçînayîşê pêroyî virazîyabîy. Yanî, tam bîy 10 aşmî ke partîyê Îraqî seba ronayîşê hukmatî yewbînan reyde bazar kenê.

Peynîya peyêne de Nûrî el-Malikî hewna wezîfeyê serekwezîrîye girewt û kabîneya hukmatê neweyî rona û meclise ra ray girewt.

Kabîneya newîye ya hukmatê Îraqî 42 endaman ra virazîyêna. Nînan ra 29 hebî wezîrîye kenê, 13 endamê bînî zî do wekîlîye bikerê.

Kabîneya newîye de 18 wezîrî îtîfaqê şîayan ra, 11 wezîrî grûba el-Îraqîye ra, 8 wezîrî lîsteya Kurdîstanî ra, 2 wezîrî tirkmanan ra, wezîrêk koalîsyonê el-Ewsatî ra û wezîrêk zî xirîstîyanan ra yê.

Nûrî el-Malikî destpêk de gama ke programê xebata hukmatê neweyî pêşkêş meclisî kerd, qet behsê madeya 140. ya qanûnê bingehînî yê Îraqî nêkerd. Naye ser o lîsteya Kurdîstanî xo aciz kerd û waşt ke hukmat ra vejîyê. Naye ser o el-Malikî rexneyê kurdan qebul kerd û madeya 140. kerde madeya tewr verêne yê programê xo.

Seke yeno zanayene madeya 140. ya qanûnê bingehînî yê Îraqî derheqê mintiqayanê Kurdîstanî, bitaybetî bajarê Kerkûkî ke nika binê hukmê hukmatê Îraqî yê merkezî de yê. Goreyê na made, ganî nê mitiqayan de weçînayîş virazîyo, goreyê netîceyê weçînayîşan do îdareyê nê mintiqayan bellî bibo. Kurdî mucadele kenê ke ca, mintiqa û şaristanê ke qedîmî ra aîdê kurdan ê la nika binê îdareyê kurdan de nîyê ancîna bigêrîyê Kurdîstanî ser û bikewê binê îdareyê kurdan.

Na xebere 2621 rey wanîyaya

ŞÎROVEYÎ

Ziwan û Wijdan

Cemîl Ehmed

Na xeberî de yeno vatene ke penîya 10 aşmî de axirêk iraq de hukumat ronîya û ez zî binê na xeberî ra şirove nusena..Homa durûsto û durûstan ra zî heskeno..Eke ez zî bi durûstî vajî, meseleya mi ronayişê hukumatê iraqê nîyo û tu xema mi zî nîyo..La ez paweno ke, dilê şarê ma kirdan de, hukumatê xelaskerdene ye no ziwano qedîm û bêwayir û bêqeder kêy roniyeno!

Ax bira çi qederê ma ya pîs a ke ma peynîya heme şarê dînya de mendîy..Nêzana çira ziwan û kulturê şarî, ma re hende şêrîn o û êy ma zî hende tal û tirş o bira..Gelo na nuşteya çarê ma yo kirdan o ke, ma gera ziwanê şarî tim û tim ziwanê xo ra rindêr qiseybiki, zêdêr qimet bidî ci!!

Ti ewniyênî merdimî re mîyanê wertê ye hamnanê de selêk simer nêkeno, çira ke ziwan û kulturê êy aver şîyo, zêde yeno qiseykerdişî û nuştişî, qîmet vîneno,beno wayirê fam û ferasetî û merdimî hesebyeno..Êy ti, la êy ti bira, çira ke tepîya mendo, aver nêşîyo, ti panc quruşî qîmet nêvînenî, wazên ti hezar qat zanayî, camerd, welatperwer û ti wayirê çewres kiteban bibî..

Axx bira axx ez nêvana la derdanê mi vanî..Ti vanî ez welatperwer a û ti werzenî serreyê xo dejnênî ziwanê şarî musênî, hendê weş ti musênî ke hetê nuştiş û wendişî ra, zafanê wayirê êy ziwan zî qasê ti nêzanî..La ti çenda aver şêrî, herçî bêqusur biki zî, zerrîyê ti çizz keno, yew nalayişê tenik vengdano ti zerrî ra..Ti awir danî peynîyê xo, ziwanê ye to ke, dadîyê to bi êy reyde vengdabîy to, pîrîkê to seba ke to şirî hewna, zimistananê serd û vewrinan de bi êy reyde sanikan vatbîy to goşî re, vinderto hendê melûl, hendê bêwayir û hende milkewtî ewnîyeno to re..! Ziwanê to ye qedîm beno gireyêk kewno qirikê to, beno zincîrêk lêfyeno linganê to, beno kilê adirî kewno zerrîye to..Ti herçî ra remênî la ti nêeşkênî wijdanê xo ra biremî û peynî de ti mecbur manênî benî teslîmê wijdanê xo..Ti hama newe zanî ke çîyêk ti kenî, kêmanî tede esta, ti zanî ke ziwan sey insanan ganîyo, sey ewladêk o, hetta ku kulfetê to vêşan bo ti nêeşkênî kulfetê şar mirdkêrî..

Ez serrê ya newe ye şarê xo firaz keno û hêvî keno ke serrê newe de do şarê ma hîna veşî wayirê ziwanê baw û kalanê xo bivejo...

31 Kanûne 2010 Îne 08:34

bexudar

kurdi kurdistano zazaki

29 Kanûne 2010 Çarşeme 19:39

Seba heme şîroveyan bitikne( 2 )