Tirkîya de 86 Hepisxaneyê Neweyî Virazîyenê

Parlamenterê Batmanî yê BDP Bengî Yildizî meclisa tirkan de derheqê hepisxaneyanê Tirkîya de persnameyêk da serekê meclise ke wezîrê edaletî cewab bido. Naye ser o wezîrê edaletî yê Tirkîya Sadullah Enginî cewabê xo de da zanayene ke panc serranê vernîya ma de do 86 hepsxaneyê neweyî virazîyê. Kapasîteya nê hepisxaneyan 40 hezar û 26 kesî ya. Malîyetê viraştişê înan zî 1 mîlyar 796 mîlyon 604 hezar 527 TL yo.

Goreyê îstatîstîkanê ke wezîrê edaletî yê Tirkîya day, serra 2002 de 524 hepisxaneyî Tirkîya de fealîyet de bîyê û nê hepisxaneyan de 73 hezarî 725 kesî hepsî bîyê. Serra 2002 ra hetanî 2010, 52 hepisxaneyê neweyî amey viraştene. Goreyê îstatîstîkanê roja 31 adara 2010î nê hepisxaneyî kapasîteya xo ra % 107 vêşî dekerde bîyê. Yanî, 8 hezarî û 201 kesî zêdeyê kapasîteya hepisxaneyan hepsan de bîyê.

Goreyê malumatê ke wezîrê edaletî yê Tirkîya day, serra 2012 de 32 hepisxaneyê neweyî dekewenê fealîyet. Serra 2013 de11 hepisxaneyê neweyî abenê. Serra 2014 de 22 hepisxaneyê neweyî abenê û serra 2015 de zî do 12 hepisxaneyê neweyî abibê. Bi no qayde serra 2015 de 662 hepisxaneyê Tirkîya temam benê.