Şêx Seîd Dîyarbekir de bi hîrê parçeyî

Serekê hereketê kurdan yê serra 1925î Şêx Seîd badê 85 serran emser Dîyarbekir de hetê hîrê grûbanê cîyayan ra bi hawayêko cîya-cîya ame yad kerdene.

Grûba verêne ke Dîyarbekir de Şêx Seîd û şehîdê bînî yê serra 1925î yad kerdîy, Grûba Diyalogî ya Dîcle-Feratî (Dicle-Fırat Diyalog Grubu) bî. Berdevkê TEVKURDî Sebahedîn Korkmaz, serekê şaxa HAK-PARî yê Dîyarbekirî Arif Sevinç û gelek sîyasetvanê bînî zî tede, şêlikêka qelebalixe roja 28.06.2010, badê nimajê teştareyî verê berê Olî Camîya Dîyarbekirî de kom bî û îdamkerdişê Şêx Seîd Efendî û embazanê ey protesto kerd. Yadkerdiş de seba ruhê Mela Mistefa Berzanî, Qazî Mehemed, Seîdê Kurdî, Seyîd Riza, Şêx Seîd û heme şehîdanê Kurdîstanî fatîha ameye wendene. Û dewleta tirkan ra ame waştene ke cayê gorra bawkalanê kurdan eşkera bikero.

Kombîyayîş de berdevkê platformî Muhyedîn Batmanli, keyê Xalit Begê Cibrî ra nuştox û sîyasetvan Tehsîn Sever û sîyasetvan Îbrahîm Guçluyî qisey kerd.

Na grûbe roja 26.06.2010 de zî salona veyveyî ya Kaplanî de derheqê şehîdanê serra 1925î de yew konferans viraştbi. Konferans de Abdulîllah Firat, Tehsîn Sever û Silêman Kurşunî qisey kerdbi. Qasê 250 kesî beşdarê nê konferansî bîbîy.

Ganî merdim bido zanayene ke, nê derûdorî bîy panc serrî Dîyarbekir de Şêx Seîd û şehîdanê bînan yê Kurdîstanî yad kenê. Reya verêne roja 29.06.2006 de, binê nameyê komela Kurd-Komî de, verê berê Olî Camî de Şêx Seîd û şehîdê serra 1925î amebîy yad kerdene.  

Emser Dîyarbekir de grûba diyine ke Şêx Seîd yad kerd, Partîya Aştî û Demokrasî BDP û derûdorê aye bîy. Na grûbe plan kerdbi ke roja 29.06.2010 de salona Merkezê Kulturî yê Cegerxwînî de saete 14.00 ra hetanî 17.00 panelêk organîze bikero. Şan de saete 19.00 de zî meydanê Berê Koyî de mewlid bido wendene.

Panelê BDP virazîya la seba mewlidî walîyîya Dîyarbekirî destûr nêda.

Panel de, seba nêdayîşê destûrî, hukmatê AKP ame protesto kerdene. Çîyêko balkêş zî no bi ke beşdaranê panelî ra merdimêk bi nameyê Felat Özsoy ke xo sey torinê Şêx Seîdî da şinasnayene, hetê Grûba Diyalogî ya Dîcle-Feratî ra yadkerdişê Şêx Seîdî bi “provakatorîye” sucdar kerd la nêda zanayene ke yadkerdişê înan senî û çira beno provakatorîye. Ganî merdim naye zî vajo ke derûdorê Partîya Aştî û Demokrasî (BDP), na reya verên a ke Şêx Seîdî yad kenê.

Grûba hîrêyine ke Şêx Seîd yad kerd, komela Mustazafan (Mustazaf-Der) bî ke esas bi nameyê Hîzbullahî yena nas kerdene. Na grûbe zî reya verên a ke wazena Şêx Seîdî yad bikero. Mustazafan (Hîzbullahîyan) waşt ke meydanê Berê Koyî yê Dîyarbekirî de yew beyanatê çapemenîye biwanê la mudirîyetê asayîşê Dîyarbekirî destûr nêda înan zî. Grûba mustazafan meydanê Berê Koyî de kom bîy, berpirsîyaranê komele malumatêko kilmek da ke beyanatê înanê çapemenîye ameyo betal kerdene û dima vila bîy.

Bi Bi no qayde, 85 serrî ra pey, Dîyarbekir de dardekerdişê Şêx Seîdî û kurdanê bînan hetê grûbanê cîya-cîyayan yê kurdan ra bi refleksanê cîya-cîyayan yad bi.