28 Kanûne 2009 Dişeme 08:51

Stokholm de Şewa Şîîranê Kurdkî

[Xebere]
Zazakî.NET

Şewa şîîranê kurdkî ke hetê komeleya nuştoxanê kurdan yê Swêdî ra organîze bîye roja 25.12.2009, şan de Stokholm de virazîya. Şayî saete 16.00 ra hetanî 21.00 dewam kerde.

Şewe de serekê komeleya nuştoxan Zinar Soranî xêrameyîş ro mêmanan kerd. Dima ra Serdar Roşanî şewe îdare kerde. Ewilî behsê programê şewe kerd û dima ra bi zazakî û kurmancî Malmîsanij dawetê wendişê şîîran kerd. Malmîsanijî yew şîîra zazakî wende. Malmîsanijî ra pey, dengbêj Armancî temburê Remzî reyde çend deyîrî vatîy.

Bêdê înan Sidqî Hirorî, çend şîîrê xo wendîy. Ey ra dima Baha Şêxoyî bi tembur û vengê xo şewe şên kerde. Ey ra dima zî Felemez Akadî çend şîîrî wendîy.

Ganî Kemal Burkay zî biameyne la mazuratêk ra nêşêya bêro. Endamê komeleya nuştoxan Xaluqî çend şîîrê ey wendîy. Şewe bi muzîk û tembûrê Baha Şêxo, Armanc, Lorîn û Remzî dewam kerde û hetanî saete 21.00 ramite. Şewe de 30 merdiman vêşêr beşdarî estbîy. Zehfê beşdaran endamê komela nuştoxan bîy.

Fotografî: www.radioasti.org

Na xebere 3219 rey wanîyaya

ŞÎROVEYÎ

KIRD

KIRMANC

Merheba to rê,
Kelîmeyê KIRDKÎ, KIRMANCKÎ, DIMILKÎ şarê xerîbî qay (semedê) hişê ma têmîyankerdişî nêvetî. Şarê ma bi xo, zafane xo ra vano kird yan zî kirmanc. Kelîmeya "ZAZA"yî şarê ma bi xo zaf nêvano. Hîna zaf xerîbî ma ra vanî zaza. Ewro kesê ke wazenî kurmancan û kirmancan yewbînî ra dûrî fînî û kurdbîyayîşê ma înkar bikî, tena vanî zaza; mexsus nêvanî KIRD yan zî KIRMANC.
Hîna rast o ke ma xo ra vajî KIRMANC yan zî KIRD çunke şarê ma xo ra wina vano.
Kirmanckî (Kirdkî) yew lehçeya ziwanê kurdkî ya û ma zî yew parçeyê miletê kurdî yî. Qet sebeb çin o ke ma ziwan û miletê xo ra şubhe bikî.

28 Kanûne 2009 Dişeme 23:51

zaza

homa gorey şıma raşt biyaro şımari asaneyi pilinra bıdıro

ez yew taleve o. semed zazaki merax u geyrayeyi mı zaf est o xora nibiyayışışı acayib mendin neyse

ez evnano site ya şıma una xabati kaliteyin vıraştayiş merdomi esti se no zıwano ma kayi xelas beno vin beno nezano

yewna çizi ez veynenını ke munakqaşeyi ser zazaki. tayek vani lehça ya tayek vani xob xo yew zıwan a.xabatkari vateyi yew per ne gore teşkil keni.ez vana ke ekse yew malumati no munaqaşi ser siteye de bo hına rınd beno

ez zerya şıma(ona merdomin raxbetin) şikıtış newazeno la misal vani ke zazaki kırdki kirmanci dımıli nezon hin çına çına no qali ez vano kayiki hiş zazayan te mu kerdişi semedin vacin

dekbaz@gmail.com

_____________________________________________________
Notê Edîtorî:
Vanê, zemano ke leşkerê osmanîyan dor ro Îstanbulî girewtbi, mîyanê zanayanê bîzansîyan de munaqeşe bîyêne ke gelo çend melekî eşkenê serê derzînêk de ronişê.
Xora ma hol zanê ke peynîya bîzansîyan senî bîye!
Afil û safil şîy û şîy.
Heme qesr û qonaxê înan bîy cayê çay û qaweyê tûranîyan.
Nika xortê ma yê tern û tezeyî zî weriştê, herinda ke wayîrîye ro ziwanê xo bikerê, herinda ke ziwanê xo aver berê, dest pêkerdo munaqeşe kenê ke zazakî yew ziwano xoserbîyaye yo yan yew lehçeyê ziwanê kurdkî yo.
Homa aqil bido! Homa ma hîdayet bikero! Ez vajî çi?

28 Kanûne 2009 Dişeme 14:10

Seba heme şîroveyan bitikne( 2 )