zazaki.net
18 Tebaxe 2017 Îne
Girdîya Karakteran : 12 Punto 14 Punto 16 Punto 18 Punto
09 Sibate 2011 Çarşeme 13:18

Serrgêra Mergê Zulkîf Xoceyî de...

Mihem Himbêlij

Birawo Delal, Şoreşgero Nimûne Zulkîf Xoce,

Mergê to ser ra yew serri viyarti. La ma qet mergê to qebul nêkerd. Ma mîyan di fîzîkî çinêbîyayîşê to, ma rê zaf çetin yeno. Ma zaf bêrîya to kerda. Lakim raşteya jîyani sey vaşê talî cal bo zî mêrdim ena raştey ra nêşêno dûrî bikwiyo. Ti fîzîkî ma mîyan di nêbê zî ma bi rihê to jîyenê û to danê jîyan kerdiş. La bawer biki birawo delal, bê to jiyani weş niya. Bê to boya ma zaf teng a. Ma zaf bêriya to kerda.

Qahreman û xoverodayoxê zîndanê Amedî,

Zîndanê Amedî di dijminî ver o wexto ke behsê xoverodayîşê to beno, xayînî, îxanetkerdoxî û teslîmbiyayey, sey telûyo ke vayêdê kurrî ver bikewo tîr-tîr rivîşîyenê. To zîndanê Amedî di xoverodayîşêdo dîrokên nawna. Heyanî ke ma ana dinya qambaxi di ganî yê, ma do netewdewletanê dagîrkerê Kurdîstanî ver o xoverodayîşê to, xo rê esas bigî. Ma bi to sereberz î.

Birawo delal,

Ti zanî aşma sibati di serehewanayîşê Şêx Seîdî di ma bawkalê xo Abdullah şehîd da. 12ê aşma sibati di adir banê ma girot, qesba ma, ma fek ra vir bî, ma to vînî kerd. Aşma sibati qandê ma aşmêda sîya ya.

Birawo delalî, ma bi malbatî zaf bêrîya to kerda. Bê to jîyani weş nîya lo birawo delal. Rehma Allay to ser o bo. Bimani di weşîyê di.

Mihem Himbêlij

Stockholm, 09.02.2011

Na xebere 1346 rey wanîyaya
No nuşte hema şîrove nêbîyo.