zazaki.net
17 Tebaxe 2017 Panşeme
Girdîya Karakteran : 12 Punto 14 Punto 16 Punto 18 Punto
09 Hezîrane 2010 Çarşeme 11:32

Qatîlanê Engîn Çeberî rê Cezaya Muebedî

[Xebere]
Zazakî.NET

Mehkemaya Çarêsine ya Bakirkoyê Îstanbulî derheqê bi îşkence kiştişê Engîn Çeberî de cezaya muebedî da çar kesan.

Engîn Çeber û hîrê embazê xo roja 28.09.2008 de gama ke yew kovare vila kerdêne hetê polîsan ra tepişîyaybîy. Engîn Çeberî verî qereqolê polîsan de, dima zî, Hepisxaneyê Metrîsî yê Îstanbulî de îşkence dîbî. Naye ser o roja 10.10.2008 de nêweşxaneyê Etfalî yê Şîşlî de îşkence ra merdbi. Engîn Çeber şarê Xorxolê Çewlîgî bi, gama ke merd 29 serre bi. O wext fîlmê îşkencekerdişî ke bi Engîn Çeberî bîyêne çapemenîye de vila bibîy. Naye ser o wezîrê Edaletî yê ê wextî Mehmet Ali Şahinî zî îşkence qebul kerdbî û ozrê xo waştbi.

Naye ser o derheqê 60 kesan de dewa abîbî. Mehkemaya Çarêsine ya Bakirkoyê Îstanbulî celseya peyêne ya mehkemekerdişî ke roja 01.06.2010 de virazîya, cezaya muebedî da çar kesan.

Mehkema de mudîrê diyine yê Hepisxaneyê Metrîsî Fuat Karaosmanoğlu û qerdîyanan ra Nîhat Kızılkaya, Selahattin Apayadın û Sami Ergazî cezaya girankerdîye ya muebedî girewte la dima hakimî, vera mehkema de halê înanê holîye sedem nîşan da û cezaya girankerdîye ya muebedî tada kerde cezaya muebedî.

Mehkema, polîsanê qereqole Mehmet Pek û Abdulmuttalip Bozyelî rê zî seba ke bi Engîn Çeber, Cîhan Gün, Uzgur Karakay û Aysu Baykal îşkence kerdo her yewî rê hewt serrî û şeş aşmî ceza da. Hewna, qardîyananê Hepisxaneyê Metrîsî Murat Çise û Yavuz Uzunî rê zî seba ke bi Engîn Çeber, Cîhan Gün û Uzgur Karakayî îşkence kerdo her yewî rê hewt serrî û şeş aşmî ceza da. Hewna, mehkema doktorê hepisxaneyî Yemlîxa Söylemezî rê zî seba ke “ewraqê sexteyî viraştê” hîrê serrî ceza birna. 

Mehkema qardîyan Yusf Gayır, Cuma Kaçar, Turan Günaydın û Muharem Çeliki rê seba ke wezîfeyê xo îhmal kerdo panc aşmî ceza, serekmemur Nevzat Kayım, Oncay Bozo û Mehmet Polatî rê qesten birîndarkerdiş ra panc aşmî, Erdoğan Coşadereli û Nurî Atalay ke wezîfeyê xo îhmal kerdo rê panc aşmî, binefser serekçawîş Abdulkadir Öztekinî rê qesten birîndarkerdiş ra panc aşmî ceza birna. Mehkema seba 39 kesan zî qerarê beratî da.

Na xebere 1315 rey wanîyaya
No nuşte hema şîrove nêbîyo.