Perwerde de Domanê Kurdan Peynî de yê

Goreyê netîceyê îmtîhanê tesbîtkerdişê sewîye yê wendekaranê sinifê 8. yê serra 2010î Tirkîya de şaristanê kurdan tewr peynî de yê. 15 domanê ke Tirkîya de 10 rêzanê tewr verênan de ca gênê zî heme wendegehanê taybetîyan ra yê. Bi no qayde îsbat beno ke wendegehê dewlete û sîstemê perwerdeyê resmî îflas keno.

Labelê sedemê apeymendişê domamanê kurdan sîstemê perwerdeyê dewlete ra vêşêr ziwanî ra eleqedar o.

Serekê şubeyê Egitm-Senî yê Dîyarbekirî Abdullah Karahan na babete de wina vano: “Peynîya her îmtîhanî de şaristanê kurdan apey manenê. Sedemê naye zî ziwanê dayîka xo de perwerde nêbîyayîş o. Miletêk ke ziwanê xo yê eslî de perwerde nêvîno caran nêşêno ser kewo. Beno ke tayê serkewtişê ferdî bibê la serkewtişê komelkî caran mumkin nîyê. Coka ma her tim vanê ganî kurdî ziwanê dayîka xo de perwerde bibê.”