zazaki.net
18 Tebaxe 2017 Îne
Girdîya Karakteran : 12 Punto 14 Punto 16 Punto 18 Punto
17 Çele 2011 Dişeme 09:00

Peçeteyê Kolonyayinî Zerar Danê Sihetê ma

Zazakî.Net

Pisporê tenduristîye ma hîşyar kenê ke peçete yan zî desmalê hazirî yê kolonyayinî seba ke madeyê kîmyayî tede estê, zerar danê sihetê ma. Pisporî vanê, eke şima bi peçete yan zî desmalanê kolonyayinan destê xo pak bikerê, muheqeq ganî şima destanê bi awa pake hol bişuwê.

Seke yeno zanayene nê serranê peyênan de peçete û desmalê kolonyayinî her ca de estê. Restorantan de, mekteban de, keye de, cayê karî de, nêweşxaneyan de, axir her ca nê peçete û desmalî yenê bikarardiş. Heta ke binê pitikan zî bi nê peçete û desmalan pak beno. Nê peçete û desmalî bi amancê ke hîjyenîk ê, yenê bikarardiş la tede madeyê kîmyasalî estê.

Gama ke merdim yew peçete yan zî desmala kolonyayine biesirno ci ra yew tewir awe yena war. Na awe kîmyayî ya. Eke merdim zaf wext pêsero nê peçeteyan bikar bîyaro, canê merdimî ser o madeyê kîmyayî yenê pêser û zerar danê sihetê merdimî. Bitaybetî tutê ke canê înan şeliqîyayo, eke bi nê peçete û desmalanê kolonyayinan bêrê pak kerdene, madeyo kîmyasal hîna leze û bi asanî keweno mîyanê gonîya pitikan.

Heto bîn ra, pisporî danê zanayene, seba ke teleb zaf o, zafê nê peçete û desmalan goreyê standardan ra nêvirazîyênê, yanî, fîrmayê ke ruhsetê înan çin o, nê mehsulan virazenê û dekenê pîyase. Yanî, dereceyê madeyê kîmyayî ke peçete û desmalan de esto zî hetê dezgeyanê sihetî ra kontrol nêbeno.    

Pisporî vanê, pakîtîya tewr hole a ya ke merdim bi sabun û awa pake destanê xo bişuwo. Hetanî ke mumkin o, merdim peçete û desmalanê kolonyayinan nêgureno, hîna hol o.       

Na xebere 1556 rey wanîyaya
No nuşte hema şîrove nêbîyo.