Partîyanê Kurdîstanê Başûrî Îtîfaq Kerd

Partîyê Kurdîstanê Başûrî seba ke parlamentoyê Bexdadî de pîya hereket bikerê, programêk ser o pêkerd û Îtîfaqê Fraksîyonanê Kurdîstanî rona.

Lîsteya Îttîfaqê Kurdîstanî, Hereketê Goranî, Yekgirtûyê Îslamîyê Kurdîstanî û Komela Îslamîya Kurdîstanî weçînayîşê pêroyî yê Îraqî de ke roja hewtê adara 2010î de cîya-cîya dekewtîbîy weçînayîş û hemîne têpîze de 58 parlamenterî vetbîy. Partîyê kurdan seba ke parlamentoyê Îraqî de pîya hereket bikerê û bi hawayêko pêt kurdan temsîl bikerê, programêk ser o pêamey.

Badê ke netîceyê weçînayîşan bellî bi, heme partîyê kurdan binê serekîya Mesud Barzanî de çend rey kom bîy. Axir roja 28ê nîsane de resay netîceyêkê musbetî û vera partîyanê ereban de îtîfaq kerd. Nameyê îttîfaqê kurdanê Kurdîstanê Başûrî “Îtîfaqê Fraksîyonanê Kurdîstanî” yo. Bi no qayde heme hêzê Kurdîstanê Başûrî do parlamentoyê Îraqî de pîya hereket bikerê.