Newepel, Şewçila û Weşanxaneyê Roşna Fuara Kitaban de yê

Fuara Çarine ya Kitaban ya TÜYAPî roja 14 gulane 2013 saete 12.00 de Dîyarbekir de sehaya fuare de abîye. Fuara Kitaban heta roja 19 gulane 2013 dewam kena.

Rojnameyê ma Newepel, kovara edebî hunerî Şewçila û Weşanxaneyê Roşna çarçewaya Komela Ziwan Huner Kulturî Ziwan-Komî de reya verên a ke beşdarê fuare benê.

Standê Ziwan-Komî de cildê Newepelî (cildê diyin 26-48 û heme hûmarê Newepelî cildê 1-50), heşt hûmarê Şewçila, ancî heme kitabê ke Weşanxaneyê Roşna ra vejîyayê;

1-Dersê Ziwanî,

2-Ferhengê Kurdî (Zazakî)-Tirkî yê cêbe

3-Binê Dara Valêre de

4-Tarîyîya Adirî de

5-Bero Sûr

6-Sanikê Dadîye Mi

7-Û kitabê Ehmedê Dirihî Ferhenga Navê Nebatan a Kurdî (Kürtçe Bitki Adları Sözlüğü) ke Unîversîteya Artuklu çap kerdo zî standê Ziwan-Komî de ca girewt.

Standê Weşanxaneyê Vateyî zî sey her serre emser zî fuare de cayê xo girewt. Bi no qayde reya verên a ke di standê kirdkî fuare de ca gênê.

Nînan ra teber bi desan weşanxaneyê kurdan ke bi kurmanckî weşan kenê fuare de cayê xo girewt.

Ancî nê panc rojanê fuare de bi desan çalakîyê edebî hunerî kulturî organîze benê û gelêk nuştoxê kurdan tede qisey kenê.

___________

Not: Standê Ziwan-Komî kîşta standê Unîversîteya Dîcle de yo.