zazaki.net
21 Teşrîne 2017 Sêşeme
Girdîya Karakteran : 12 Punto 14 Punto 16 Punto 18 Punto
19 Êlule 2010 Yewşeme 08:17

Netîceyê Tehqîqatanê Komîsyonê Taybetî Red Bîy

Xebere: Zazakî.Net

Dezgeyanê heqanê azadîya rojnamegerîye û keyeyê rojnameger Serdeşt Osmano ke Kurdîstanî Başûrî de bi hawayêko muphem amebi kiştene, netîceyê tehqîqatê komîsyonê taybetî yê hukumatê Kurdistanê Başûrî red kerd.

Seke yeno zanayene rojnameger Serdeşt Osman Hewlêr de wendekarê unîversîte bi û rojnameyan de pratîkanê gendelîye ser o xeylî meqaleyî nuştbîy û karbidestê Kurdîstanê Başûrî rexne kerdbîy. Mesela, Serdeşt Osmanî yew meqaleya xo ya zaf huşke ya bi sernameyê “Ez kênaya Mesud Barzanî ra hes kena” de pratîkê gendelîye rexne kerdbîy. Demê peynîyan de kî yew meqaleya bîne de vatbi “Ez binê tehdîdê kistene der a la qet xemê mi nîyo, ez merdena xo û randewuyê qatîlê xo ser o fikirêna.”

Badê ke meqaleyê ey weşanîyay, Serdeşt Osman roja 04.05.2010 hetê tayê merdimanê nenasan ra Hewlêr de nêzdîyê universeîteya ke ey tede wendêne ra amebi remnayene û badê di rojan termê eyo serecirakerde Mûsil de amebi dîyene. Badê ke gelek reaksîyonî amey nîşan dayene, serekê parlamentoyê Kurdîstanî Başûrî Mesud Barzanî emir da ke yew komîsyono taybet yê tehqîqatî ronîyo. Axir nê komîsyonê taybetî netîceyê tehqîqatanê xo nê hewteyî de eşkera kerd ke qaşo Serdeşt Osmanî soz dayo ke rêxistina fundamentalîste ya îslamî Ensar el-Îslamî rê bixebitîyo la dima fek sozê xo ra veradayo, coka hetê na rêxistine ra ameyo înfaz kerdene.

Keyeyê S. Osmanî, grûbanê kurdan û dezgeyanê heqanê merdiman û azadîya rojnamegerîye nê îdîa û netîceyê tehqîqatanê komîsyonê taybetî red û şermezar kerdîy.

Birayê Serdeşt Osmanî Bekir Osman ke Swêd de ciwîyêno, bi nameyê keyeyê S. Osmanî va “Ma netîceyê nê tehqîqatî red keme û karê nîyanênî kî şermezar keme, wazeme ke verva nê teşebusî hêrsê xo îfade bikerîme, çunke bi no ûsul S. Osman sey yew terorîstê Ensar el-Îslamî yeno nîşan dayene.”

Bekir Osmanî dima wina dewam kerd û va “Kamo ke Serdeştî nas keno û meqaleyanê ey ra xeberdar o, zaneno ke o laîq o û îdeolojîya terorîstîye ra kî zaf durî yo.” Dima kî va “Ma wazeme ke yew tehqîqatêdo xoser bivirazîyo.”

Nêzdîyê se rojnameger û nuştoxanê kurdan kî Mesud Barzanî rê yew mektube rusna û ci rê nê tehqîqatê resmî ser o şikê xo da zanayene.

Koordînatorê pawitşê azadîya rojnamegerîye Centre Metroyî Rehman Xerîbî kî va “Netîceyê nê tehqîqatî qet tatmînkar nîyo, çunke heyat, hal û hereketê Serdeştî qet o îhtîmal nêdano ke merdim vajo eleqeyê xo û bi grûbanê terorîstan esto.”

Komîteya Pawitişê Rojnamegeran ya Mîyanneteweyî (CPJ) ya New Yorkî kî va “Bi netîceyê nê tehqîqatê resmî ma kewtîme mîyanê dehşet û hayretî.”

Mesulanê CPJ ra Mehemed Abdel Dayemî kî va “Ma omid kerdêne ke netîceyê nê tehqîqatî yew raporê 430 çeku û îdîayanê vengan ra zîyadêr bîyene.”

Raportoranê Rojnamegeranê ke Sînoran Nêşinasnenê (RSF) kî va “Ganî merdim verva nê nêtîceyenê resmîyan ‘bidîqqet’ vindero, çunke nê pêropîyo îtîrafanê ‘yew keşî’ ra îbaret ê.”

Xeberê têkildarî:

CPJ Mesud Barzanî rê Mektube Şawite

Daxuyanîya Roşinbîrên Kurdan

 

Na xebere 1289 rey wanîyaya
No nuşte hema şîrove nêbîyo.