Nûbihar Yew Kovara Tutan Vejeno

Kovara Nûbiharî ke 21 serrî yê weşanê xo domneno, wazena bi her di lehçeyanê kurdkî ke Kurdistanê Vakurî de qisey benê, yanî bi kirdkî û kurmanckî yew kovara tutan vejo.

Seba name, şekl û muhtewaya kovare, berpirrsîyaranê Nubiharî tayê persî amade kerdê. Eke wendoxê ma zî eleqedar bibê; fikr û pêşnîyazanê xo cêr ra, cayê şîrove de binusî zaf baş beno.

Mesajê kovara Nûbiharî wina yo:

“Hevalê Erjayeyî!

Seke şima zî zanê, Nûbihar warê kultur, huner û edebîyatê kurdan de 21 serrî yo ke weşangerîya xwu domneno û hetanî nika gelêk kitabê kurdkî û kovara Nûbiharî weşanayê.

Labelê na xebata ma ya dergûdila de tutan (domanan, qeçekan, qijan) ser o çi heyf ke xebate tay ameya kerdene. Şima zî zanê ke mileto ke tutanê xwu îhmal bikero nêeşkeno bireso hedef û amancê xwu.

Nê sedemî ra, rewna ra yo ma sey Nûbiharî tay bo zî wazenê na kêmanîye telafî bikin û seba tutan kovarêk bi kurdkî (kurmancî û kirdkî) biweşanin.

Şawitişê nê mesajî de amancê ma no yo: ma hem wazenê şima xebatêka winasî ra xeberdar bikin hem zî fikr û pêşnîyazanê şima yê erjayan ra îstîfade bikin.

Seba dîyarkerdişê çarçewa û muhtewaya kovarêka tutan ma paweyê cewabê şima yê…

Keremê xwu ra cewabê xwu bişawin na adrese: xelildost@hotmail.com

Seba eleqedarîya şima nika ra ma zaf sipas kenê, bimanin mîyanê xeyr û weşîye de. 

Persê ma:

1-Şima gore wa nameyê na kovara tutan çi bo?

(Cewabdayîş de keremê xwu ra tutanê xwu ra zî bipersîn.)

2-Kovare wa goreyê çendserreyan bo?

3-Şima gore na kovare de kamcîn beş û babetî estbê baş beno?

(Cewabdayîş de keremê xwu ra tutanê xwu ra zî bipersîn.)

4-Na xebate de şima eşkenê seba ma hetkarî, destek û paştgirîyêka senîne bikin?

5-Gelo derûdorê şima de kesê ke karanê sey xêzkarîye, resimviraştiş, hîkayenuştiş, meselavatiş, şîîrnuştiş, viraştişê xaçepersan, vatişê fiqra û çibenok ûsn de hetê ma bikerê estê? Eke şima kesanê winasîyan şinasnenê, keremê xwu ra têkilîya ma bi înan virazin…

6-Ma wazenê her hûmara kovare de dîyarîyêk bidin wendoxanê xwu. Gelo merdim eşkeno çîyanê senînan dîyarî bikero?

(Cewabdayîş de keremê xwu ra tutanê xwu ra zî bipersîn.)

7-Nê persan ra teber eke fikr û pêşnîyazê şima estbê keremê xwu ra ma rê binusin."