zazaki.net
20 Oktobre 2017 Îne
Girdîya Karakteran : 12 Punto 14 Punto 16 Punto 18 Punto
22 Hezîrane 2014 Yewşeme 09:09

Merasîmê Mezunîyetî yê Malimîya Kurdkî

Xebere: Zazakî.Net

Emser Unîversîteya Artûklû ra 310 kurmanckî 90 kirdkî ra 400 wendekarê lîsansê bêtezî, yanî malimê kurdkî mezun bîyî. Roja 20.06.2014 de salona konferansî ya unîversîte de bi beşdarîya gelêk meymaman merasîmê mezunîyetî virazîya. Merasîm de rektorê Unîversîte Prof. Dr. Serdar Bedîî Omay, cagirewtoxê rektorî û serekê beşê Kurdolojî Prof. Qedrî Yildirim, serekê beledîyeya bajarê girdî yê Mêrdînî Ehmed Turk û nameyê wendekaran ser o zî Özlem Akkan qisey kerd. Badê merasîmî dengbêj Metîn Barlık, hunermend Mirady û Gulistan Perwer muzîk pêşkêş kerd.

Metnê qiseykerdişê wendekaran wina yo:

Nameyê wendekaranê beşê kurdkî ser o şima rê rêz û silamî

Mêmanê birêzî! Mamostayê erjayeyî! Embazê delalî!

Ma pêro weş zanê ke seba ke ma bişêyî behsê kultur, huner û edebîyatê miletêk bikî, verê heme çî ganî ziwanê ê miletî estbo. Reyna ma weş pê zanî ke virazîyayene û averşîyena şexsîyetê merdiman de ziwan wayîrê rolêkê çiqas girdî yo. Nika ma nêwazenê tîya sereyê şima bi nê melumatî bidejnî. Ma do bi kilm û kurdkî vajî.

Ewro, nê welatî de, sazgehêka akademîke de, bi seyan wendekarê beşê ziwanê kurdkî mezun benê. Ancî ma baş zanî ke bi temambîyena nê bernameyî karê ma nêqedîyayo û nêqedîno. Bi eksê ney, barê milê ma hîna giran beno.

Gelo verê ma çi hêvî kerd û dima ma çi dî? E, raşt a, ma ra zafînî bi eşq û şewqêkê girdî, bi coş û meraqêkê vêşî muracatê nê programî kerd. Bêguman hetê ekonomî ra zafê ma biendîşe bî. Ez bawer kena ke ma ra zafîne hêvî nêkerdêne ke do tîya bernameyêko wina pirr, kadroyê wina hemaheng û pisporî estbê. Labelê roj bi roje asayênê ke warê kurdnasî de tîya çend aver o. Rastiko ez nameyê xo ser o vaja, eza ke mi xo warê ziwan û edebîyatê kurdkî de hende aver hesibnayne, mi fehm kerd ke ez çiqas nezan a û kêmaneyê mi estê.

Herçiqas warê îlmî de sînor çin bo zî, yanî merdim nêşêno bibo zanayeyêko bêkemane zî, ewro ez bi asanî şêna vaja ke eke warê kurdkî de ez zanayeyêka bêkemane nêba zî êdî ez sey verê nezan nîya. Û seba naye ra zî ez zaf îftîxar kena.

Helbet no çî xovero nêvirazîya. Ez vernî de rektorê unîversîte birêz Prof. Serdar Bedîî Omayî rê zaf sipas kena. Eke rêberîya ey nêbîyêne, ne no beş awan bîyêne û ne zî no kadro tîya kom bîyêne.

Reyna gelekî sipas mamostayê ma Prof. Kadrî Yildirimî rê. Eke ferasetê ey nêbîyêne belkî ewro ma tîya merasîmêko winasî nêkerdêne.

Îcab nêkeno ke ma nameyê mamostayan yew bi yew bihûmarî labelê xora nameyê înan caran vîr ra nêşino. Înan hem ufûqê ma yo fikrî hera kerd hem zî bi tevgeranê xo yê merdimane bîy nimûne. Xeyrê înan ra tîpê akademîsyenê serdin û cemidîyayeyî ke sereyê ma de bî, vurîya.

Êdî ne sey wendekaran la sey mamostayanê kurdkî çend waştişê ma estê: 1)Ganî kurdkî çarçewaya dersêka weçînaya de nêro dayene la çarçewaya perwerdeyê ziwanê dayîke de bêro dayene.

2)Ganî wendegehan de ma sey kadroyî tayîn bibîn. Çunke ma bêstatubîyene çi rey qebul nêkenê.

Reyna, huzurê şima de, çi îdarî çi akademîk, ma heme kedkaranê unîversîte rê û bitaybetî beşê kurdkî re sipas kenê.

Weşîye de bimanîn. Selam û rêz.

Na xebere 2223 rey wanîyaya
ŞÎROVEYÎ
ali
ali veli
sazgehêka akademîke. Sazgeh bi xo nêrî yo. Ez vajî qey xelet nusîyayo. :)
25 Hezîrane 2014 Çarşeme 17:23