Laleşê Nûranî Restore Beno

Goreyê beyanatê ke qaymeqamê qezaya Şêxanî Heso Nermoyî da, projeyê restorekerdişê Laleşê Nûranî 850 hezar dolar butçe ameya abirnayîş û demeyêko nêzdî de dest bi restorasyonî beno.

Qaymeqamê Şêxanî Heso Nermoyî da zanayîş ke, hukmatê Kurdîstanê Başûrî roja yewê nîsane de yew şîrketa almanan reyde peymana restorekerdiş û hîrakerdişê cayê Laleşê Nûranî îmza kerde. Seba restorasyonî 850 hezar dolar pere ameyo abirnayîş û restorasyon do serrêk de temam bibo.

Badê ke restorasyon temam bibo û Laleşê Nûranî turîzmê zîyaretkerdoxan rê abibo, qerar ameyo girewtiş ke butçeyêka mengane zî seba Laleşî bîyero abirnayîş.

Seba ke demeyê restorekerdişî de destkarîyêk taybetîyanê kulturî û tarîxî yê Laleşê Nûranî ser o nîyero kerdiş, yanî seba ke xususîyetê orîjînalî yê bîna nîyerê xeripnayîş, komîteyêka xususî ke cematê rûhanî yê êzidîyan û wezaretê dîyanetî yê Kurdîstanê Başûrî ra virazîyaya, do serpereştîyê projeya restorasyonî bikero.

Cayo pîroz yê dînê êzidîyîye Laleşê Nûranî Kurdîstanê Başûrî de mîyanê şaristanê Duhok û Mûsilî de qezaya Şêxanî de yo. Goreyê tayê çimeyan ra, Laleşê Nûranî hîrê hezarî serrî verê mîladê ra awan bîyo.