zazaki.net
20 Tebaxe 2017 Yewşeme
Girdîya Karakteran : 12 Punto 14 Punto 16 Punto 18 Punto
30 Adare 2012 Îne 10:42

Kursê Kirdkî Qedîya

Xebere: Zazakî.Net

Kursê kirdkî ke hetê komela Ziwan-Kom û komela Nûbiharî ra organîze bi û roja 12 adare 2012 de banê komela Nûbiharî de dest pêkerdbi, roja 29 adare 2012 de qedîya.

Kurso ke tam hîrê hewteyî, rojanê dişeme, sêşeme, çarşeme û panşeme yê mîyanê hewteyî badê saeta mesaî, şan de saete 18.00 ra hetanî 20.00 dîyayêne, pêro pîya duwês rojî dom kerd.

Da-vîst kursîyerî beşdarê kursî bîy. Nînan ra yew-di kesê ge-ge karê înanê mecburî vejîyayê ne tede, yê bînî sere ra hetanî peynî bi hawayêko muntezem beşdarê kursî bîy. Kurs sere ra hetanî peynî atmosferêko nermek de zaf bisemere vîyart. Mesela, peynîya kursî de hema vajîn ke zafaneyê kursîyeran dest bi nuştişê kirdkî kerd.

Kurs de, new dersanê verênan de teorîya ziwanî û taybetîyê kirdkî ameyî musnayîş. Hîrê dersanê peyênan de zî nuşteyanê kursîyeran ser o dersê pratîkî ameyî dayîş. Sey xebata atolye, bi projeksîyon, nuşteyê kursîyeran her hetan ra kursîyeran reyde ameyî redaktekerdiş. Heto bîn ra, demeyê kursî de wendişê kirdkî zî ame musnayîş.

Kursîyerê ke reya verêne dest bi nuştişê kirdkî kenê, nuşteyê înan do hûmaranê ameyayan yê rojnameyê Newepelî de bêrê weşanayîş.

No kursê pancin o ke parî ra nat hetê Komela Ziwan Huner û Kulturî (Ziwan-Kom) ra organîze beno. Kurso verên destpêkê 2011î de Odaya Tebîban ya Dîyarbekirî de, kursê diyin wisarê 2011î de banê komela Ziwan-Komî de, kursê hîrêyin hamnanê 2011î de banê komela Grûba Dîyalogî ya Dîcle-Fratî de, kursê çarin zî payîzê 2011î de banê dezgeyê fikrî Dîtamî de amebî dayene. Kursê verênan de teqrîben qasê pancês kesî tim beşdar bîyêne. La nê kursî peyênî de hûmara kursîyeran tewr vêşî bî. No zî nîşan dano ke vera-vera şarê ma hîna vêşî eleqe nîşanê kirdkî dano.

Komela Ziwan-Komî plan kena nê hewa kursan daîmî bikero. Bitaybetî zî komelanê cîya-cîyayan yê şarê Dîyarbekirî reyde organîze bikero. Komele wina bawer kena ke ziwan objektêkê argumentanê propagandaya partîyanê sîyasîyan ra vêşêr erjêko muşterek yê heme miletî yo. Coka ganî her kategorî û grûba miletî eynî derece de wayîrîya ziwanê xo bikero.

Heto bîn ra, netîceyê nê kursan de komela Ziwan-Komî ke parî ra nat rojnameyê safî bi kirdkî Newepelî weşanena, nuştoxê xo yê ke benê kadroyê kirdkî, xo rê bi nê fealîyetanê xo, bi îmkananê xo ana meydan.    

 

Na xebere 1605 rey wanîyaya
ŞÎROVEYÎ
zaradeş
guhderz
Kursê kırdkî zaf weşbî. Êki ci verdi emeg werdê pêrinrê sipas kena.
30 Adare 2012 Îne 15:48