zazaki.net
20 Tebaxe 2017 Yewşeme
Girdîya Karakteran : 12 Punto 14 Punto 16 Punto 18 Punto
17 Êlule 2010 Îne 17:20

Kurdîstanê Başûrî Bîyo Cenetê Şirketan

Xebere: Zazakî.Net

Goreyê reqemanê wezaretê bazirganîye yê Kurdîstanê Başûrî 11 hezarî û 95 şîrketî Kurdîstanê Başûrî de fealîyet kenê.

Her ke şino Kurdîstanê Başûrî de sehaya karî vêşî bena. Goreyê fikrê berpirsîyarê qeydanê şîrketan yê wezaretê bazirganîye Dilzar Îsmaîlî, seba ke asanîya qanûnî esta û îmkanê karî vêşî yê, coka her roje Kurdîstanê Başûrî de hûmara şîrketanê cayî û xerîban vêşî bena.

Berpirsîyarê qeydanê şîrketan yê wezaretê bazirganîye Dilzar Îsmaîl va, her hîrê eyaletanê ke nika binê îdareyê kurdan de yê de 9 hezarî 603 şîrketê cayî û hezar û 871 şîrketê xerîbî estê; Hewlêr û Duhok de 7 hezarî 113 şîrketê cayî 871 zî şîrketê xerîbî, Silêmanîye de zî 2 hezarî 490 şîrketê cayî û 621 şîrketê xerîbî estê.

Emser aşma gulane de beyan bibi ke 1200 şîrketê xerîbî Kurdîstanê Başûrî de estê ke 600ê înan yê şarê Tirkîya yê. Wina aseno ke aşma gulane ra nat, yanî hîrê aşman de, Kurdîstanê Başûrî de 300 şîrketê xerîbî zêdîyay.

Goreyê qanûnan ra Kurdîstanê Başûrî de seba ke yew şîrket abibo ganî tewr tay mîlyarêk dînar sermaye nîşan bido. Seba şîrketêkê mîmarîye zî ganî 200 mîlyon dînar sarmaye estbo. Labelê tam nêno zanayene ke nê şertî pratîk de çiqas yenê ca yan tetbîq benê.

Heto bîn ra walîyê Duhokî Temir Remezanî da zanayene ke goreyê hîrê serrî verê cû bazirganîya ke sînorê Brahîm Xelîlî ra mîyanê Tirkîya û Kurdîstanê Başûrî de bîyêne se ra di sey (% 200) zêdîyaya. Nika yew serre de 6 mîlyar dolarî bazirganîye bena. Walî Temir Remezanî ser o zêdna û va, îhtîmalêko pîl, serra 2011î ra pey tena berê Brahîm Xelîlî ra mîyanê Tirkîya û Kurdîstanê başûrî de yew serre de 8 mîlyar dolarî ra vêşêr bazirganîye bibo.

Wina aseno ke hem hetê ekonomîye ra hem hetê perwerdeyî ra û bitaybetî hetê sîyasî ra Kurdîstanê Başûrî Tirkîya ra yeno girêdayene.     

Na xebere 1604 rey wanîyaya
ŞÎROVEYÎ
Kizildogan
Mustafa
"Başûr" yew çekuya xerîb a, Kirmanckî de "Veroj" esto, yanî luzim nîyo ke ma çekuyêda newîye virazîme.
18 Êlule 2010 Şeme 23:20