Kurdî Referandum de Vanê “Erê”

Dîyarbekir de partî û grûbê sîyasî ke teberê Partîya Aştî û Demokrasî (BDP) de manenê, beyanatêko muşterek vila kerd û da zanayene ke do referandumê 12ê êlule ke qismêk madeyê qanûnê bingehînî vuryenê de raya xo sey “erê” bidê.

Endamanê Partîya Heqan û Azadîye (HAK-PAR), Cigêrayîşê Kurdanê Demokratan, Têwgerê Kurdanê Demokratan û Grûba Dîyalogî ya Dîcle-Feratî semtê Ofîse yê Dîyarbekirî de roja 16.08.2010 de seba ke derheqê referandumî de fikrê xo beyan bikerê, yew kombîyayîşê çapemenîye viraşt. Grûbe bi kurdkî (kurmanckî û zazakî) û tirkî beyanatê xo wend.

Beyanatê grûbe de ame vatene ke “Ma sey grûbanê kurdan ke wayîrê meylanê cîya-cîyayan ê, ma wina bawer ê, hetanî ke yew qanûnê esasî ke rastîya Tirkîya ya zafneteweyî, zafziwanî û zafkulturîye nîşan dano û sere de şaro kurd heme cîyayîyanê Tirkîya yê etnîkî û dînî şarê tirkî reyde şertanê cuya seyyewbînan garantî keno nêvirazîyo, manaya rastîne de demokrasî û aştîyêka rastkêne mumkin nîya. Polîtîkayê red û înkarî ke komara Tirkîya awanbîyayîşê xo ra nat ramitê, şekl dayo karakterê qanûnanê bingehînan yê nîjadperest-şoven û antîdemokratîkan.”

Beyanat de ame vatene ke qanûnê esasî yê 12ê êlule zî bi nê ruhî şekl girewto û bi zor cematî ser o ameyo ferz kerdene û wina dewam bi: “Pakêta vurnayîşê qismêkê qanûnê esasî zî eşkera yo ke karakterê bingehîn yê qanûnê esasîyê mewcudî bin ra nêvurneno û çarekerdişê problemanê sîyasî û cematkî xo rê nêkerdo amanc. Labelê ma gamanê demokratîze bîyene muhîm vînenê. Ma bawer kenê ke nê gamî îmkan danê ke meseleya kurdan zemînêkê rastkênî de bêro munaqeşe kerdene. Nê sedemî ra, pa heme kêmanîyanê xo, seba ke pakêta vurnayîşî ya ke pêşkêşê referandumî bena; seba ke qanûnê esasî yê 12ê êlule de qelşêk akena; seba ke statukoyê ke eleyhê şarê kurdî de şekl girewto hejnena; seba ke rejîmê wesayetî apey bena; seba ke tayê vernîakerdişanê qismîyan virazena; seba ke ver bi vurnayîşanê pêroyî yê qanûnê esasî yê mewcûdî gamêk erzîyêna ma vanê erê”

Peynî de veng ame dayene ke wa şar raya xo sey erê bido û wina ame vatene: “Sere de şarê xo, ma venga heme hêzanê demokratîkan danê ke referandumo ke 12ê êlula 2010î de beno de raya xo ‘eke qîm nêko zî; erê’ bidê.”