zazaki.net
21 Tebaxe 2017 Dişeme
Girdîya Karakteran : 12 Punto 14 Punto 16 Punto 18 Punto
02 Hezîrane 2010 Çarşeme 08:23

Kongreya Hewtine ya PENa Kurd Virazîya

[Xebere]
Zazakî.NET

Kongreya hewtine ya PENa Kurd rojanê 21-23 gulane de, şaristanê Königswinterî yê Almanya de virazîya. Kongre de heme lehçeyê ziwanê kurdkî, nuştoxê wayîrê fikr û îdeolojîyanê cîya-cîyayan amey têhet.

Kongre goreyê rojevê ke verê cû ameybîy tesbît kerdene virazîya. Badê ke akerdişê kongre virazîya û dîwan tesbît bi, selam û mesajê ke seba kongre şawîyaybîy amey wendene. Dima komîteya îdareyê PENa Kurd û her çar komîteyanê aye raporê xoyê xebate pêşkêş kerdîy û raporan ser o munaqeşeyî bîy. Badê pey zî seba xebata îstîqbalî ya PENa Kurd nê pêşnîyazî amey kerdene:

1.Seba ke ziwan, edebîyat û kulturê kurdan hîna vêşî bêro şinasnayene ganî PENa Kurd bineyna bilebitîyo. Hewna, bitaybetî Kurdîstanê Rojhelatî de seba ke vernî ro girewtiş, îşkence û îdamkerdişê nuştoxanê kurdan bigêrîyo, ganî PENa Kurd bêveng nêmano.

2.Komîteyê xebate yê PENa Kurd, bitaybetî komîteya tercume û ziwanî, komîteya zindanîyan, komîteya aştîye û komîteya cinîyan ganî bêrê pêt kerdene û komîteyî bineyna holêr karê xo bikerê.

3.Ganî PENa Kurd hertim xoserbîyaya bimano û vera heme partî û hetanê sîyasî yê kurdan de wayîrê eynî helwêste bo.

4.Keyepelê PENa Kurd de nuşteyê bêsewîye û hêrîşkarî ganî nêweşanîyê, PENa Kurd ganî wareyê weşane de xo biresno standardê keyepelê PENa Mîyanneteweyî.

5.Ganî PENa Kurd parçeyanê Kurdîstanî de buroyan akero û temsîlkaran tayîn bikero. Hewna, ganî PENa Kurd bilebitîyo ke endamanê xo welat de bizêdno.

6.Seba ke PENa Kurd desttengîye ra nêşêna zaf karan bikero, coka ganî bilebitîyo ke hetê ekonomî ra rewşa xo holêr bikero.

7.PENa Kurd dayreyê bacgirewtişî yê Almanya de bi hawayêko resmî qeydkerde ya. Coka ganî têkilîya xo PENa Almanan reyde aver bero.

8.Ganî PENa Kurd nika ra xo amadeyê kongreya PENa Mîyanneteweyî bikero ke do aşma êlule de paytextê Japonya Tokyo de virazîyêna.

Badê ke munaqeşe û pêşnîyazî qedîyay, îdareyo newe yê PENa Kurd ame tesbît kerdene. Serekê PENa Kurd Dr. Zerdeşt Haco bi zafaneyê rayan newe ra sey serekê Pena Kurd ame weçînayene. Seba komîteya îdarekerdoxe zî Bêrîvan Doskî, Kakşar Oramar, Mîrhem Yigît û Bedredîn Salih weçînîyay. Necîb Balayî û Ebdula Hîcab zî sey cagirewtoxê komîteya îdarekerdoxe weçînîyay.

Na xebere 1578 rey wanîyaya
No nuşte hema şîrove nêbîyo.