Kombîyayîşê Asayî yê Ziwan-Komî

Çarê kanûna serra 2010î de xeylê kesê welatperwer û heskerdoxê lehçeya kirdkî, seba munaqeşekerdişê armanc û rayîr û rêbazê pêroyî yê “Komela Ziwan, Huner û Kulturî (ZIWAN-KOM)”î, Galerîya Amedî de salona Odaya Muhasiban ya Dîyarbekirî de kombîyayîşê xo yê asayî saz kerd.

Badê yewbînanşinasnayîşê endaman bi qalîkerdişê birêz mamosta Roşan Lezgînî dest bi guftogoyî ame kerdene.

Sazkerdoxanê komele ra, mamosta Lezgînî va: “Armanco tewr muhîm yê na komele, tena aver berdena lehçeya kirdkî û ciwînayîşê huner û kulturê ma kirdan o.

ZIWAN-KOM, sey heme komelanê hunerîyan yê kurdan, heta ke ci ra bêra do xo nîqaşanê sîyasîyan ra bipawa, komelanê bînan yê kurdan reyde îrtîbatêko dostane yo hêzdar awan bikera û bida berdewam kerdene, di warê hunerî de, înan ra îsîfade bikera û di mesela pawitena menfeetê neteweyî yê şarê Kurdistanî de hesas têbigêra.”

Derheqê xebata komele de Roşan Lezgînî qiseykerdişê xo wina da berdewam kerdene: “Eke bi mi bo, ez wazena ma bi çapkerdişê kitabê yewin yê kirdkî ke serra 1899 de hetê kurdperwerê namdarê rehmetî seydayê Xasî ra bi lehçeya kirdkî ameyo nuştene, dest bi xebata xo bikerî.

Reyna na çarçewa de, kursê banderkerdişê lehçeya kirdkî biakerî, kayanê şanoyê kirdkî  organîze bikerî, deyran û lawikanê gelêrîyan newe ra biancê pêser û bidî ciwînayene ûbn.”

Eya, nê qiseykerdişê kilm yê Roşan Lezgînî ra pey, serekê komele û sazkerdoxanê aye ra yew, birêz avuqat Bîlal Nêribijî zî îşaretê çend nuqtanê muhîman kerd û rolê komele berz erjna.

Ancîna, sazkerdoxanê komele ra Seîd Bazbendij û Ehmed Dirihî, her yewî, baredê xo ra, xebata komele ser o biney qisey kerd û rolê xo yê şexsî yê mîyanê komele de ard ziwan.

Qalîkerdişê nê çar embazan ra pey, beşdarbîyayan ra kamî ke waşt, fikr û teklîfê xo îfade kerd û sazkerdişê komeleyêka inasarêne silam kerd.

Badê cû, bi dîyar kerdena tarîxê kongreya pêroyê ya komele, peynî bi kombîyayîşî ame.