zazaki.net
29 Adare 2024 Îne
Girdîya Karakteran : 12 Punto 14 Punto 16 Punto 18 Punto
20 Tebaxe 2010 Îne 12:22

Keyepelê Zazakî.Netî Yewserre yo…

Xebere: Zazakî.Net

Tam bî serrêk ke keyepelê Zazakî.Netî fealîyet de yo.

Keyepelê kirmanckî (zazakî) Zazakî.Net adresa www.zazaki.net de par roja 20.08.2009 de bêîddîa, bi hawayêko mutewazî dest bi weşane kerd.

Keyepelê Zazakî.Netî mîyanê serrêk de, se ra newayê înan bi kirmanckî (kirdkî, zazakî, dimilkî) dorê 600 tene nuşteyî (meqale, xebere, roportaj, bîyografî yan zî sewbîna nuşteyî), dorê 100 tene meqaleyê nuştoxan, 21 albumê fotografan û 63 tene vîdeoyî weşanayê. Nuşteyanê kirmanckî ra ê ke hewteyêk ra ver keyepel de aliqnîyayê, tewr tay 275 rey, tewr zaf 2130 rey ameyê tiknayene. Merdim şêno bi asanî vajo ke her nuşteyê kirmanckî tewr tay teqrîben hetê 300 kesî ra ameyo wendene.

Aşma verêne 24 saetan de teqrîben 100 IPê cîya-cîyayî dekewtêne keyepel. Goreyê reqema roja 19.08.2010, yew roje de 480 IPê cîya-cîyayî keyepelî zîyaret kenê. Hetanî ewro 45 hezarî û 439 IPanê cîya-cîyayan keyepelê Zazakî.Netî zîyaret kerdo û têpîze de her IP 4 deqîqeyî û 41 sanîye keyepel de mendo.  

Roja ke keyepelê Zazakî.Net dest bi weşane kerdo hetanî ewro, hema vajîn ke tewr tay her roje yew nuşte ro keyepelî bar bîyo. Yanî, keyepel her tim rojane bîyo. Heto bîn ra, keyepelê Zazakî.Netî ewro sey yew arşîvêkê muhîmî yê lehçeya kirmanckî yo. Kesê ke biwazê derheqê na lehçe de bibê wayîrê malumatî, bi asanî şênê gelek hetan ra fotografêko muhîm yê na lehçe bivînê. 

Weşanayîşê nuşteyan de hetanî ke ma ra ameyo, hetê rastnuştiş û qaydeyan ra ma ziwan rast şuxulnayo. Xora prensîb û hesasîyetê ma yo tewr sereke no yo ke ma ziwanî standard û rast bişuxulnin. Nê hetî ra, nuşte û xeberê ke ma bi xo amade kerdê de zêde muşkileyê ma çin bîy. La nuşteyê ke teber ra ameyê, ma bi ezîyet û kedêka muhîme redakte kerdê, hîna weşanayê. Redaktekerdişê nuşteyanê teberî de bineyke problemî estê. Nê probleman ra qismêk wina yê: nuştoxî wina hesab kenê ke nuşteyê înan redakte beno coka ehemîyet nêdanê rastnuştişî; herinda ke her nuşte de xo bineyna aver berê, tam tersê ey, her nuşte de apey şinê û bi no qayde karê redaksîyonî zehmetêr kenê. Qismêk nuştoxî zî estê ke îtîraz ro redaktekedişî kenê, tetbîqkerdişê qaydeyanê gramerî qebul nêkenê, bitaybetî îtîraz ro formê çekuyan kenê.

Ma nêzanê wendoxî û şarê ma çiqas teqdîr keno la wareyê Înternetî de seba lehçeya kirmanckî na xebate performansêko bêemsal o. Merdim şêno bi asanî vajo, na reya verên a ke bi xebata Zazakî.Netî lehçeya kirmanckî (zazakî) de xeberê rojaneyî amade benê û weşanîyênê. Yanî, bi no qayde yew ziwanê çapemenîye ameyo meydan. Qet nêbo, wareyê rojnamegerîye û amadekerdişê xeberan de nika gelek numûneyî verê destê ma de estê. Bi no qayde, îsbat bi ke sey ziwanî tu kêmanîyêkê kirmanckî (zazakî) çin o. Eke merdim wayîrîye bikero, kirmanckî (zazakî) şêna her ware de bêro şuxulnayene.  

Helbet ma nêvanê kêmaneyê ma çin ê, bêguman estê. La ganî ma xo vîrî ra nêkerin ke na xebatêka mutewazî ya kesane ya. Keremê zerrî ra û bi îmkananê şexsî bena. Kesê ke ardim bikerê, hetkarîye bikerê, piştgirîye bikerê û moral bidê ma, zaf kêmî yê. Eke zaf kêmî bê zî, kamî bineyke ardim kerdo, yan moral dayo ma, ma hemîne rê sipas kenê. Labelê kesê ke seba yew xeletîya masume gala ma bikerê, kesê ke nenganê ma biçînê, kesê ke moralê ma bixeripnê, her tim estê û zaf bîyê. Ma înan zî hewaleyê wijdanê înan kenê.

Ma hêvîdar ê ke wendoxê erjayeyî derheqê xebata ma de rexne û pêşnîyazanê xo ma ra vajîy ke ma zî hîna hol xizmetê ziwan û kulturê xo bikerin. Seba ke na xebate hîna xurt û pêt dewam bikero, ma bi her hawayî muhtacê eleqeyê wendoxanê erjayan ê.

Sey vateyê peyênî, Homa bikero ke na xebate heta bi heta dewam bikero û her roje hîna xurt û pêt aver şiro.

Na xebere 3001 rey wanîyaya
ŞÎROVEYÎ
Jew serriya şima wa bi xeyr bo...
Milla Cimayo babij
Qandé kultur u ziwané Zazaki ré wa xebata şima tim dewam bikero. Şima zerri ra tebrik kena, piroz kena. Bimanén bi xeyr u weşey di. (^^a)
22 Tebaxe 2010 Yewşeme 18:14
WEŞHALÎ
Berxewdar PÎRANIJ
Erjaye kak Roşan! Ez sere de serreneweyê keyepela Zazakî. NET î pîroz kena û serkewtış aya rê wazena. Goreyê bawerîya mı bı xo, verê bı sayeyê na keyepela erjaya û tarîxî ra û dıma zî bı ayanê ke sey ayayî ra, do no lehçe/ zarê mayo weş û şîrın tepamendış û rewşa xırabîye ra bıxelısîyo, çıke bı ked û xebata ganfîdayanê sey cenebê şıma ê aşıqanê zıwan û edebîyatê mıleta xo, do roj bı roj meydanê xebate hîra bebo û bıreso sînorê xo yo raştıkên û tebîî. wa şıma tımo weşebî paştîya şıma pêt bo û qelema şıma têje bo . zaf ŞABAŞ.
22 Tebaxe 2010 Yewşeme 09:24
xêr ser bo!
royê murad
cara vêrîn 2 aşmî vêra cû bi mi nameya na keyepelî,sîteya xeberdiyarbekir da dî u ez dekewta na keyepelî u badê êy ez bîyo nêweşî keyepelê şima..hettanî rojêk ci nêkewta ez rehet nêbeno..hetê raştnûştişê ziwanî ra zaf kêf mi na keyepelî ra yeno! ez keyepelî bînan kê name êynan nêwazena tîyada bidî, raştî nûşteyan kirdkî yeno u gava ez wanena pêy zaf qehiryena! ziwan baş nêşuxulnênî, ne hetê nûştişê ra u ne zi hetê wendişî ra manêno ziwanêk kurdkî, to wanî qêy ziwanêk çînî u mongolî yo! wexta to cira rexnê şawênî qebul zi nêkenî!! gani ma rêklamî keyepelan sêy na keyepelî her cay di bikî u ma wendişî u vilakerdişî qaydêyî nuştişê ke xebatî komeleya vate da ameyo qebulkerdiş, bizêdinî! homa kemanî şima nêdo!!
21 Tebaxe 2010 Şeme 20:57