zazaki.net
24 Teşrîne 2017 Îne
Girdîya Karakteran : 12 Punto 14 Punto 16 Punto 18 Punto
15 Kanûne 2011 Panşeme 19:59

Huseyin Karakaş: Ewlehîya Mi Çin a!

Seba ke heqê îtîrazî destê mi ra bigêrê, bi zanayîş şan de badê saeta mesaî mi rê teblîxat ame ke sewqê mi seba hepisxaneyê Çankiri vejîyayo.

Hîkayenuştox Huseyîn Karakaş ke cezaya muebedî girewta û “Hepisxaneyê Numre 2 yê Tîpê F yê Kocaelî” de cezaya xo antêne, surgunê “Hepisxaneyê Tîpê E yê Çankiri” bîyo. Huseyîn Karakaşî derheqê rewşa xo de mektubêk şirawita ke Hepisxaneyê Çankirî de ey ra teber tu mehkumêko sîyasî çin o, ewlehîya ey zî tehlukede ya.

Goreyê xebera ke keyepelê ANF de weşanîyaya, Huseyîn Karakaş mektuba xo de rewşa xo wina îfade keno: “Roja 11 teşrîne 2011, seba ke heqê îtîrazî destê mi ra bigêrê, bi zanayîş şan de badê saeta mesaî mi rê teblîxat ame ke sewqê mi seba hepisxaneyê Çankiri vejîyayo. Bê ke firsend bidê mi ke ez xebere bidî keyeyê xo, şefeqêk saete 05.00 de bi lez û bez înan ez surgunê hepisxaneyê Çankiri kerda ke tu mehkumêko sîyasî tede çin o. Binê odaya muşahedeyî ke di kesî tede manenê de, înan ez dekerda odayêka serbanê aye nizmek û berbate de ke qey hewa nêgêna. Oda de ne masa ne kî sandelîya esta, seba ke ez merdimêko tim wanena û nusena, coka seba nuştişî mi îdare ra masa û sandelîya teleb kerdîy la bi hawayêko keyfî no telebê red bi. Hewna, piştîya mi dejê kronîkî estê, derheqê naye de destê mi de raporî estê, mi çend rey îdare ra nivînêka munasibe teleb kerde la o zî red bi. Reya peyêne zî mi murcatê îdareyî kerd, mi waşt ke ez bibî aboneyê rojnameyanê Özgür Gündem û tarafî ke nênê hepisxane, la cewabê îdareyî ecêb bi. Çunke nê rojnameyê ke hemeyê Tirkîya de roşîyenê, zûrî kerd ke Çankiri de nêroşîyenê. Mi îtîraz kerd la hema zî cewab nêameyo. Tîya tena yew embazêkê mi zî çin o. Seba ke Çankiri Îstanbul ra dûrî û çep a, êdî merdimê zî nênê dîdarîya mi. Ez rojanê zaf zehmetinan ra vîyarena.”

Huseyîn Karakaş Kam o?

Serra 1968 de, qezayayanê Sêwasî ra Kangal de, “Dewa Derî” de maya xo ra bîyo. Hetanî çarês serrîya xo dewe de mendo. Mekteb qedênayo, peyê cû ameyo Îstanbul û karanê cîya-cîyayan de se karker gurîyayo. Wexto ke karkerîye kerda kewto mîyanê faalîyetê sendîkayan zî. Ey, hetê ra karkerîye kerda hetê ra zî xo bi xo wendo. Çi edebîyatê tirkan ra çi edebîyatê dinya ra bo zaf nimûneyî wendê. Tena eserê edebî ney, zaf eserê sîyasî zî wendê.

Hetanî serra 1991î mîyanê faalîyet û xoverrodayîşê karkeran de bîyo. 1991î ra pey kewto mîyanê têkoşînê xelisîyayîşê şarê Kurdîstanî. 1996 de Îstanbul de ameyo tepîştene û kewto hepisxane. Derheqê ey de seba dayîşê cezaya îdamî dawa ameya akerdene û na dawa hetanî serra 2006î dewam kerdo. Peynî de dewaya ey cezaya idamî ra çerixnaya cezaya muebbedî. Nika "Kocaeli 2 Nolu F Tipi Kapalı Cezaevi" de hepsî yo.

Huseyînî serra 1996î de dest bi nuştişî kerdo. Hetanî ewro kovaranê se Ütopya, Yurtsever Gençlik û rojnameyê Özgür Gündemî de nuşteyê ey bi tirkî, kovara Vateyî de zî hîkayeyê ey bi kurdkî (kirmanckî) vejîyayê. Hîkayeyê ke nê kitabî de yê, kovara Vateyî de vejîyayê.

Huseyîn bi tirkî zî hîkayeyan nuseno. Serra 2002yî de "Musabeqaya Hîkaye û Şîîranê Tirkî ya Desine ya Hüseyin Çelebi" de seba hîkayeya xo xelata dîyine girewta.

293

Na xebere 1807 rey wanîyaya
No nuşte hema şîrove nêbîyo.