zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
22 Adare 2017 Çarşeme 09:46

Hûmara 97. ya Newepelî Vejîya

Nuştoxanê na hûmare ra Keyaksar Ateş, Abdurehman Önen û Hebûn Stembar reya verên a ke kirdkî nusenê û Newepel de dest pêkenê.

Hûmara 97. ya rojnameyê Newepelî vejîya.

Edîtor nuşteyê xwu yê na hûmare de qisimê Kitabeyê Bêstunî ke yew çekuya bi hîrê versîyonan sey "Zâzâna", "Za-iz-zaan" û "Za-za-an-nu" vîyarena fariskî ra tercume kerdo û bêeleqeyîya na çekuye bi çekuya "Zaza" ke seba ma kirdan yena vatişî ser o vinderto.

Roportajê na hûmare Îdrîs Yazarî Mistefa Gomayijî dir kerdo. Mistefa Gomayij derheqê prosesê nuştoxîya xwu de melumatan dano, ziwan û welatî ser o zî vano: "Merdim emrê xwu de gerek di çiyon ser o zaf vindero û tawîz nêdo. Ewilî ziwanê dayîkda xwu ra tawîz nêdo. O diyin zî erdê xwu ra. Ziwan û erd ra tawîz nêdîyeno! Çunkî heme çî kê ziwan û erdî ser o nîşan dano. Folklor, kultur, tarîx, edebîyat, welhasilî estbiyayişê kê erd û ziwanê kê yo. Her roj ra zafêr eyro ziwanê ma û folklor û kulturê ma waharîye wazeno. Eyro zaf rojêda teng a. Ciwanên, qet xo vîr ra mekerê. Qala peyên, ez vono ke, şaranê bînan hetanî nika seba ziwan û kultur û erdê xwu se kerdo se, ma zî ey bikerê. Gerek ma erd û ziwanê xwu bêkes nêverdî."

Murad Canşadî eserê namdar yê Ehmedê Xanî Mem û Zîn ser o nuşto û yew qisim kurmanckî ra tadayo kirdkî ser. Keyaksar Ateşî nuşteyê xwu de behsê xebata xwu ya amadekerdişê Ferhengê Ziwanê Avesta - Kurdkî kerdo. Abdurehman Önenî nuşteyê xwu de behsê qezaya Dêrike ya Mêrdînî kerdo. Hebûn Stembarî nuşteyê xwu de behsê yew edetê mintiqaya Silîvanî kerdo ke ci ra vanê "Ser Hivde". Sedef Kandemir bawerîya derheqê arguda çarpele de nuşto.

Meselaya "Bûz Begê Kemalûn û Xûna Dêrûn" ke Îdrîs Yazarî arêdaybî bi qisimê diyin na hûmare de dewam kena. Necîbe Kirmizigul mintiqaya Sêwregi ra mamikî arêdayê û tarîfê werdî amade kerdo. Mesûd Aslanî mintiqaya Licê ra tayê çibenokî, Bîlal Yakişan û Wesîle Doguç zî meselayî arêdayê. Şîîrê na hûmare zî yê Mûsa Şanak, Fîruzan Demir û Hesen Alkişî yê.

Nuştoxanê na hûmare ra Keyaksar Ateş, Abdurehman Önen û Hebûn Stembar reya verên a ke kirdkî nusenê û Newepel de dest pêkenê. Abdurehman Önen û Hebûn Stembar kurdanê kurmancan ra yê, seke nuşteyê xwu de zî behs kenê, prosesê Newepelî de kirdkî musayê û êdî ameyê o derece ke eşkenê binusê.

Na xebere 8173 rey wanîyaya
No nuşte hema şîrove nêbîyo.