zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
28 Oktobre 2016 Îne 09:06

Hûmara 92. ya Newepelî Vejîya

Xebere: Zazakî.Net

Hûmara 92. ya rojnameyê Newepelî vejîya.

Roportajê na hûmare Alî Aydin Çîçekî derheqê karê bi kirdkî dublajkerdiişê xêzefîlman de Umer Barasî dir kerdo. Umer derheqê karê dublajî de dergûdila melumat dano û vano: "Fikrê ma gore, televîzyonî seba standardkerdişê ziwanan mîsyonêko pîl gênê xo ser. Xora seke şima zî zanî, bi kirdkî perwerde xeylê kêmî yo û standardbîyayîş zî bi rayîrê perwerde û weşanan bingeyê xo gêno. No semed ra ziwano ke ma gurenenê ziwano standard o. Ma vînenî ke xebata standardîzekerdişê kirdkî resaya merhaleyêko baş. Heta ewro bi ziwanê standardî se ra zêdeyêr kitabî çap bîyê, kovar û rojnameyî vejîyayî û nê xebatî roje bi roje zêdîyenî. Nika metaryalê dersa weçînitî zî bi ziwanê standardî hedre benî. Eke ma fekanê herêmî bişuxulnî, ma bin ra nêvejîyenî. Xelasîya ma ziwanê standardî de ya."

Huseyîn Çakan nuşteyê xwu de çarçewaya kerdenanê rêxistina wehşîye DAIŞî de behsê xûy û xesletanê sosyolojîyê ereban keno. Huseyîn Çakan Muqedîmeya Îbnî Xaldunî (1332-1406) ra wina neqil keno: "Seba ke tehbêko wehşîyane ereban de esto, yaxmekar û xirabkar ê. Rizqê înan versîya tîran de yo, seba talankerdişê mal û milkê şarî çi sînor înan rê çin o. Çimê înan bigino çi ro, mal û hacet talan kenê. Qedr û qîymet nêdanê huner û rencê hunermendan, eseranê înan texrîb kenê. Erebî welatê ke bifînê binê hukmê xo, ê cayan de heyat xeripîyeno, şarê ê cayan remeno koçber beno, vurîyeno û xeripîyeno."

Cemşî Kaya nuşteyê xwu de, behsê reftarî û nakokîyanê kurdan yê vera ziwanê înan de keno. Aydin Baturî nuşteyê xwu de na rey mintiqaya Çewlîgî ra Çirrê Belzere dayo şinasnayîş. Hejarê Şamîlî behsê rewşa kurdanê Azerbaycanî keno ke neslê peyên yê kurdan senî milîyetê xwu ra dûr kewto. Necîbe Kirmizigul derheqê pêameyîşê cinî û camêrdan de nuşto.

Ebdulqadir Necaranij, Wesîle Doguç, Sevîm Aydin û Îsmet Borî meselayî arêdayê. Mehmed Emen û Alî Şekerî zî her yewî yew deyîre arêdaya.

Hacer Petekkaya, Îsmet Bor, Muhamed Deza Batur û Derkenar Cîhangîr Çaglayanî zî bi şîîranê xwu na hûmara Newepelî xemilnaya. Ehmedê Dirihî nameyê nebatan û Necîbe Kirmizigul zî sey hûmaranê verênan tarîfê werdî nuştê. Nînan ra teber, nuşteyê edîtorî, xeberî, xaçepers û ferhengek rojname de ca gênê.

Na xebere 5356 rey wanîyaya
No nuşte hema şîrove nêbîyo.