zazaki.net
20 Oktobre 2017 Îne
Girdîya Karakteran : 12 Punto 14 Punto 16 Punto 18 Punto
27 Êlule 2016 Sêşeme 19:20

Hûmara 91. ya Newepelî Vejîya

Xebere: Zazakî.Net

Hûmara 91. ya rojnameyê Newepelî bi nuşteyanê muhîman vejîya.

Murad Canşadî hepisxaneyan de rewşa kurdkî ser o nuşto. Zere de, eleqeyê hepsîyanê sîyasîyan kurdkî ser o senîn o, ziwanî ser o çi fealîyetî benê, helwêsta rêxistine û dewlete vera kurmanckî û kirdkî de senîn a, hetanî nika çend kitabê hepsîyan bi kirdkî weşanîyayê… Murad nê babetan ser o melumatanê muhîman dano.

Edîtor nuşteyê xwu de behsê heyranîya tayê kurdanê ma bi tirkî û tirkan keno ke na heyranîye senî şekil dayo mentalîteya sîyaset û eqlê qismêkê ma kurdan. Netîce de, dîyardeyê ke eleyhê kurdîtîye de yê, senî qismêko muhîm yê ma kurdan rê weş yenê, bi nimûneyan nîşan dano. 

Huseyîn Çakanî rewşa xortanê kirdan ser o nuşto ke bênasname mendiş ra, hîna rastê xwu, "vîndîkerdişê kamîye (kimlik yitimi)" ra senî derbeder benê; şuûr û hîsîyatê mîlî yê kurdîtîye ra kewenê dûrî û netîce de yan xwu bi çepgîrîye yan zî bi îslamîstîya sîyasî îfade kenê, kewenê mîyanê rêxistinanê şarî û telef benê şinê.

Yewna nuşteyo muhîm yê na hûmare "Ferhengekê Hewramkî - Kirdkî (Zazakî)" yo. Ferhengek de 238 çekuyî, karî û cumleyî estê ke derheqê muşterekîya kirdkî û hewramkî de fikir danê merdimî.

Wesîle Doğuç yew sanike, Îsmet Borî yew mesela, Şaynebî Laçînî mintiqaya Gêlî ra mamikî arêdayê. Necîbe Kirmizigul tarîfê werdî, Ehmedê Dirihî zî nameyê nebatan nuştê. 

Îdrîs Yazar, Mihanî Licokic, Harûn Bozkurt, Adir Dêrsimij û Umer Xeyam zî şaîrê na hûmare yê.

Nînan ra teber xeberê muhîmî, xaçepers û ferhengek rojname de ca gênê.

Na xebere 1530 rey wanîyaya
No nuşte hema şîrove nêbîyo.