Hûmara 87. ya Newepelî Vejîya

Hûmara 87. ya rojnameyê Newepelî vejîya.

Edîtor nuşteyê xwu de behsê tayê reftarîyanê nêweşan ke vera xebata kirdkî de benê keno. Roportajê na hûmare Alî Aydin Çîçekî Burhan Beyazyildirimî dir kerdo. Burhan behsê serebutanê xwu yê derheqê ziwanê dayîka xwu û nuştişê şîîran keno.

Huseyîn Karakaş nuşteyê xwu de behsê tayê edetanê kananê xeletan yê mîyanê ma kurdan de keno. Murad Celalî ke kurmanc o la bi kirdkî nuseno, nuşteyê xwu de behsê kulturê wendişî keno. Harûn Bozkurtî nuşteyê xwu de behsê hetê tirkan ra seba kurdan ronayîşê peynameyanê tirkî kerdo. Wesîle Doğuç yew serebuta xwu nuşta.

Ebdulqadir Necaranij, Sevîm Aydin û Îsmet Borî her yewî yew mesela, Mihanî Licokijî yew fiqra, Nusret Aydin û Ozan Remezan Oruçî her yewî yew deyîre, Necla Bahadir yew mamike, Roşan Lezgînî zî yew lezvate arêdayo û na hûmare de weşanayê.

Şîîrê na hûmare zî Mehmed Emen, Muhamed Deza Batur, Derkenar C. Çağlayan û Yadê Bore nuştê.

Necîbe Kirimizgul werdê ma, Ehmedê Dirihî ferhengê nameyê nebatan dewam kerdo. Nînan ra teber çend xeberê muhîmî, xaçepers û ferhengek rojname de ca gênê.

Nuştoxanê na hûmare ra Derkenar C. Çağlayan û Yadê Bore reya verên a ke kirdkî nusenê. Ozan Remezan Oruç zî reya verên a ke Newepel de nuseno.