zazaki.net
20 Êlule 2017 Çarşeme
Girdîya Karakteran : 12 Punto 14 Punto 16 Punto 18 Punto
21 Kanûne 2015 Dişeme 21:51

Hûmara 82. ya Newepelî Vejîya

Xebere: Zazakî.Net

Hûmara 82. ya rojnameyê Newepelî ancî bi muhtewayêka dewlemende vejîya.

Edîtor nuşteyê xwu de behsê nê dahîris serranê peyênan keno. Vano "Emser hamnanî ra dest pêkerd, Silîvan ra girewt, Cizîre, Nisêbîn, Dîyarbekir, Dêrike, Gever, Hezro… Yew bi yew bajaranê kurdan de ban û bînayê qedîmî heme dîyenê fekê guleyan û topan ver, her ca kenê xan û xirabe. Bajarê ke ruhê kurdîtîye tede gane bi, û eserê medenîyetanê verênan tey estbî, bitaybetî nê bajaran rijnenê, wêran kenê…"

Roportajê na hûmare Serkan Naryaprağı yew kedkarê kulturî Remezan Özgültekinî dir kerdo. Remezan Özgültekin, Sêwregi de hetê xebata kulturî, folklorî, tarîx û daşinasnayîşê şexsîyetanê namdaran ra merdimêko muhîm o. Eke yew biwazo derheqê Sêwregi de çîyek bimuso, muraatê Remezan Özgültekinî keno. Hetanî nika hîrês kitabê ci neşr bîyê. Zafê nê kitaban, behsê Sêwregi; kultur û tarîxê Sêwregi kenê.

Îsmaîl Guvenî derheqê Peymana Sevrî de yew nuşte nuşto û madêye 62, 63 û 64. yê na peymane ke derheqê kurdan û Kurdistanî de yê tirkî ra tercumeyê kirdkî kerdê. No nuşte û nê madeyî hetê zanayîşê tarîxê ma kurdan ra melumatê zaf muhîm ê.

Nuşteyê Huseyîn Karakaşî zî derheqê "îtîfaqê rûsan û kurdan" de yo. Huseyîn Karakaş îşaret keno ke xeyrê rûsan nêresayo kurdan, beno ke nika zî nêreso.

Ehmedê Dirihî derheqê endamê Ziwan-Komî û nuştoxê Newepelî Cemal Baraçî de nuşto. Cemal Baraç ke bi nameyê Cemal Azij Newepel de nuştêne, roja 07.12.2015 de şibi rehmet.

Aydin Baturî cayanê cografîkan yê Çewlîgî ra derheqê Kerreyê Zaxî de nuşto û bi ma dayo şinasnayîş. Mucahîd Dervişoğluyî zî derheqê roja heqanê merdiman de yew nuşte nuşto.

Hetê edebîyatê modernî ra, Bîlal Zîlan na hûmare bi yew hîkaye û Canê Dilo zî bi yew şîîra xwu Newepel xemilnayo. Wesîle Doguç û Mistefa Gomayijî meselayî arêdayê. Sevîm Aydin yew fiqra nuşta, Necîbe Kirmizigul werdê ma tarîf kerdê, ancî Ehmedê Dirihî nameyê nebatan arêdayê.

Nînan ra teber, xeberî, ferhengek û xaçepers na hûmare de ca gênê.

Na xebere 2504 rey wanîyaya
No nuşte hema şîrove nêbîyo.