zazaki.net
20 Oktobre 2017 Îne
Girdîya Karakteran : 12 Punto 14 Punto 16 Punto 18 Punto
25 Tebaxe 2015 Sêşeme 08:08

Hûmara 78. ya Newepelî Vejîya

Xebere: Zazakî.Net

Hûmara 78. ya rojnameyê Newepelî vejîya.

Nuşteyê manşetî yê rojnameyî de, derheqê şerê ke nika ha bakurê Kurdistanî de beno de nê îfadeyî estê: "Bakurê Kurdistanî de, mîyanê sînoranê sîyasî yê Tirkîya de, erdê kurdan ser o, şero bêhedef ke rewna ra estbi nika ancî gurr bi; gonîya ciwananê ma yê delalan ancî rijîyena, welat ancî ha mîyanê adirî de…

Bakurê Kurdistanî de şero ke hetanî nika bîyo, ne yew hedefê xo yo bellîkerde û ne zî yew formê xo estbîyo. Hîna zaf, hêzê ke dewlete û şarî îdare kenê, çi wext hewceyîya înan bi şer bîya, goreyê îhtîyacê xo pê provokasyonan şerêko bikontrol veto û dewam kerdo. Netîce de hertim şaro reben gevezîyayo..."

Nuşte wina dewam keno: "Kurdî hinî nêwazenê ke bajar û dewê înan bibê xirabe, gonîya ciwananan birişîya. Coka, hem ferdî hem zî partî, înîsîyatîf û dezgeyê sîvîlî wazenê û veng danê ke her di hetî zî destê xo sîleh ra biancê û bi muzakere na mesela safî bikerê. Ma zî beşdarê nê vengdayîşan benê ke şer bêro vindertene."

Aydin Baturî sey hûmaranê verênan na hûmare de zî cografyaya Çewlîgî ra cayanê muhîman dano şinasnayene. Murad Canşad kitabanê neweyan yê kirmanckî analîz keno. Necîbe Kirmizigul nuşteyê xo yê bi sernameyê "Holîganîya Fikrî" de fikr û hisîyatanê radîkalan analîz kena. Mucahîd Dervîşogluyî derheqê xortanê Çewlîgî de nuşto. Mucahîd, reya verên a ke kirdkî nuseno. Ma vanê ti xeyr ameyî warê nuştoxîya kirdkî.

Nînan ra teber gelêk nuşteyî muhîmî yê bînî, şîîrî û arêdayeyê folklorîkî û sewbîna nuşteyê rêzilkî na hûmare de ca gênê.

Na xebere 2879 rey wanîyaya
No nuşte hema şîrove nêbîyo.