Hûmara 72. ya Newepelî Vejîya

Hûmara 72. ya rojnameyê yewin yê safî bi kirdkî Newepelî ancî bi muhtewayêka dewlemende vejîya.

Bi na hûmare, Newepelî çar serrê xo temam kerdî. Beno ke tarîxê dinya de çar serrî wextêko zaf tay bo la seba kirdkîya ke wareyê nuştişî de hende erey kewta û bi nê îmkananê mehdûtan çar serrî biîstîqrar dewamkerdişê weşana rojnameyêk dîyardeyêka zaf muhîm a.

Nuşteyê edîtorî yê na hûmare de bi munasebetê “Roja Ziwanê Dayîke ya Cîhanî” behsê rewşa kurdkî beno. Edîtor vano “Kurdê ma, bitaybetî sîyasetkarê kurdan ke her çî de zanaye yê, heme çî zanê (!), derheqê kurdkî de rolê hîrê meymûnan kay kenê. Werrekna tena bi naye bimendêne. Mi gore sîyasetkarê kurdan meselaya ziwanî de paralelê polîtîkaya dewlete de fealîyet kenê. No senî beno? Mesela, sere de derheqê ziwanî de tu polîtîkaya sîyasetê kurdan çin a. Yanî hetê ziwanî ra bêsîyasetbîyayîş qebulkerdişê mergê ziwanî yo.”

Nuştoxanê rojnameyî ra Ehmedê Dirihî derheqê qedexekerdişê kurdkî de yew serebutê xo nuşto. Murad Canşadî zî derheqê meselaya ziwanî de nuşto û sazgehanê kurdan rexne keno ke qey wayîrîya kirdkî nêkenê.

Aydin Baturî sey hûmaranê verênan na hûmare de zî tayê cayê taybetî yê Çewlîgî dayê şinasnayîş. Mujdat Gîzlîgolî û Bedrîye Topaç kitaban ser o nuşto.

Şeyda Asmîn yew hîkaye nuşta. Nîhat Çirrî yew serebuta xo nuşta. M. Emîn Kaçan û Sezaî Memîşî meselayî arêdayê. Ancî M. Emîn Kaçanî yew kayê ma arêdaya. Kendal Tosun zî hetê Licê ra tayê vateyê folklorîkî arêdayê.

Şîîranê na hûmare ra yewe seyda Hemîd Hozanî şaîranê klasîkan yê kurmancî ra yew şîîra Sîyahpoşî tadaya: “Ma esîr ê, porê to rêzil û qeyd û bendê ma / Esîran rê rehme bike, ey aşma ezmanê ma”. Yew şîîre zî Hesen Şêrkoyî Şêrko Bêkesî ra tercume kerda.

Şîîrê bînî zî Muhamed Deza Batur, Necîbe Kirmizîgul, Hacer Petekkaya, Alî Şeker, Rohelat Aktulum, Mehmud Arif Faris û Semawî Aldemirî yê.

Ehmedê Dirihî nameyê nebatan, Nadîre Guntaş Aldatmaz werdê ma dayê şinasnayene.

Nînan ra teber, xeberî, ferhengek û xaçepers na hûmare de ca gênê.