Hûmara 68. ya Newepelî Vejîya

Hûmara 68. ya rojnameyê Newepelî ancî bi muhtewayêka dewlemende vejîya.

Roportajê na hûmare Mutlu Canî hunermend û nuştoxe Gule Mayera reyde kerdo. Gule roportajê xo de dergû dila behsê cuya xo ya hunerî û nuştoxîye kena, derheqê hunerê muzîkî û nuştoxîye de fikrê xo vana.

Aydin Baturî hetê Çewlîgî ra Gola Gerindalî daya şinasnayîş. Mujdat Gîzlîgolî derheqê teorîyanê virazîyayîşê ziwanî de nuşto. Aydin Batur reya verên a ke nuseno.

Şeyda Asmîn yew hîkaye nuşta. Feyza Adabeyî yew mesela nuşta. Mistefa Gomayijî mintiqaya Mîyaranî ra yew mesela nuşta. Îhsan Tektaşî mintiqaya Licê ra yew sanike arêdaya.

Hemîd Hozan, Şahîn Polat, Hacer Petekkaya, Dilo Bargiran, Sevîm Aydin, Adir Dêrsimij, Rohelat Aktulum, Murad Murxan û Yucel Eşsizogluyî her yewî yew şîîre nuşta.

Îsmet Borî hetê Çewlîgî ra mamikî arêdayê. Nadîre Guntaş werdê ma û Ehmedê Dirihî zî nameyê nebatan nuştê. Bîlal Zîlanî na hûmare de zî albumê mîsyoneran ra fotografê kurdanê zazayan weşanayê. Nînan ra teber, nuşteyê edîtorî, xeberî, xaçepers û ferhengekî rojname temam kerdo.