zazaki.net
26 Temmuze 2017 Çarşeme
Girdîya Karakteran : 12 Punto 14 Punto 16 Punto 18 Punto
16 Êlule 2014 Sêşeme 10:46

Hûmara 67. ya Newepelî Vejîya

Xebere: Zazaki.net

Hûmara 67. ya rojnameyê Newepelî bi mutewayêka dewlemende vejîya.

Nuşteyê edîtorî yê na hûmare de behsê problemê perwerdeyê kurdkî beno. Edîtor nuşteyê xo de vano “Sîyasetê kurdan seba ke xo tetmîn bikero, seba ke nîşan bido ke wayîrîya ziwanî keno, her serre, wexto ke mektebî abenê, vanê, wa wendekarî di hewteyanê verênan de mekteban boykot bikerê. Tena wina vanê û vîyarenê. Faydeyê xo çiqas beno, senî beno, qet îzeh nêkenê. Xora boykot zî nêbeno. Eke bikerê zî tu faydeyê xo çin o, çunke di hewteyanê verênan de xora dersî çin ê. Zafê domanan şinê mekteb, seba ke dersî veng ê, apey yenê, yan zî hewşê mektebî de tope kay kenê. Ma ferz bikin, dersî estbê zî yew doman di hewteyî boykot bikero û dima ancî şiro mekteb, çi manaya xo esta? Kam naye ra zerar vîneno? Tena doman zerar vîneno, çunke dersan ra apey maneno.

Roportajê na hûmare muzîsyen Nîlufer Akbal reyde bîyo. Nîlufere behsê muzîkê kurdan kena, rewşa muzîkê parçeyanê Kurdistanî dana têver. Vana “Heta ke tesîrê sîyasetî kurdî ser o bo, muzîkê ma azad nêbeno, xo nêvîneno, rengê xo nêvîneno. Jûyna, muzîkê kurdanê Bakurî muzîkê nêrkî yo.

Na hûmare de M. Emîn Kaçanî derheqê awbendan û vurîyayîşê muwazeneyê ekolojîkî de nuşto. Bîlal Zîlanî xebata mîsyoneran ra fotografê kurdanê zazayan arêdayê û rojname de weşanayê. M. Deza Batur, Necîbe Kirmizigul, Xetîce Kavran, Nadîre Guntaş Aldatmaz, Mutlu Can, Mehemed Çelîkten û Ehmedê Dirihî bi nuşte û arêdayîşanê xo, ancî Canê Dilo, Fîruzan Demir û Hacer Petekkaya zî bi şîîranê xo rojname de ca girewto. Nînan ra M. Emîn Kaçan û Canê Dilo reya verên a ke nusenê.

Na xebere 1870 rey wanîyaya
No nuşte hema şîrove nêbîyo.