zazaki.net
29 Adare 2024 Îne
Girdîya Karakteran : 12 Punto 14 Punto 16 Punto 18 Punto
18 Temmuze 2012 Çarşeme 12:26

Hûmara 6. ya Şewçila Vejîya

Xebere: Zazakî.Net

Hûmara 6. ya kovara edebî hunerî Şewçila bi muhtewayêka dewlemende vejîya.

Na hûmare de çend tene şîîrî estê la giranîya xo ancî hîkaye yê. 15 tene hîkayeyanê na hûmare ra 2 tene kurmanckî ra seba kirdkî ameyê tercumekerdiş. Nînan ra yew hîkayeya Enwer Karahanî, a bîne zî yê Helîm Yûsuvî ya. Her di hîkayeyî zî edebîyatê kurmanckî ra di nimûneyê balkêş ê. Seba ke edîb û edebîyathesê kirdkî edebîyatê lehçeyanê bînan nêzdî ra bişinasnê, tercumekerdişê eseranê winasîyan zaf muhîm o. Hîkayeyê ke bi kirdkî nusîyayê ra 6 hebî yê cinîyan 7 hebî yê camêrdan ê.

Nuşteyê edîtorî de derheqê na hûmare de wina yeno vatene: “Seke aseno edebîyatê ma roje bi roje aver şino. Her cumleya ke saz bena, ceribnayîşê yewna îmkanê ziwanî yo. Bitaybetî edîbê ma yê cinî ke Şewçila reyde daxilê sehaya edebîyatê ma bîyî û fotografê heqîqî yê cîhanê ma yê hunerî temam kerd, edebîyatê ma de gamê newe yê ke bi na xebata ma dest pêkenê. Hetê ma yo bîn zî no yo ke, ekolê heps û zindanan xo bi hawayêko pêt nîşan dano. Embazê delalî ke peyê beran ra nusenê, edebîyatê kirdkî de wayîrê rolêkê zaf muhîmî yê. Û xora xebata ma de çîyo tewr muhîm no yo ke êdî kirdkî ziwanê edebîyatî yo. (…) Helbet rojêk do nê averşîyayîşî analîz bibê. La ez vana, o hîs, xeyret û lebata zeresotîye û a keda pak û masume ke peyplanê nê geşbîyayîşî de dîyena, do caran nêro zanayîş. Çunke no eşq ne tarîf beno û ne zî merdim şîno qisey bikero!...”

Na hûmare de Bedrîye Topaç, Şeyda Asmîn, Nadîre Guntaş Aldatmaz, Zerîn Azrawa, Enwer Karahan, Adir Dêrsimij, Rohelat Aktulum, Alî Aydin Çîçek, Umer Faruq Ersoz, Roşan Lezgîn, Huseyîn Karakaş, Îdrîs Yazar, Erkan Tekîn, Mela Eyub Qizilaxacî, Dilo Bargiran û Sitarê Xelan hîkaye û şîîrî nuştê. Nînan ra teber yew hîkayeya Enwer Karahanî yew zî yê HelîmYûsuvî lehçeya kurmanckî ra, yew şîîra Umît Yaşar Oguzcanî zî tirkî ra ameya tadayîş.  

Na xebere 3210 rey wanîyaya
ŞÎROVEYÎ
qeteko_21@hotmail.com
mehemed ÇELîKTEN
dest û zerrî ya şima weş bo.Allah şima pêrinra razî bo. serdar roşan û embazanê rayirda ci. zaf spas, zaf selamî....
04 Oktobre 2012 Panşeme 04:44