Hûmara 57. ya Newepelî Vejîya

Nuşteyê edîtorî yê na hûmare de vengdayîşê seba wayîrvejîyayîşê Newepelî ancî dewam keno. Edîtor nuşteyê xo de vano “… zerrîya ma ra nêna ke ma fek na xebate ra veradin, wijdanê ma tehemul nêkeno. Labelê seba ke quwet û qudretê ma qîm nêkeno, coka ma paştgirî teleb kenê. Heto bîn ra no karêko neteweyî yê ma hemîne yo, coka eke mumkin o, her kes cayê xo de bilebitîyo, aboneyan peyda bikero yan bibo abone, rojnameyî vila bikero, bido wendiş zaf baş beno. Ma zî a game hîna zerrî ra rojnameyê xo dewam kenê. Belkî her kesî ra zafêr hewceyîya ma bi moral û motîvasyonî esta.”

Na hûmare de Murad Canşad, Şeyda Asmîn, Mistefa Gomayij, Îsmet Bor, Şukran Arca, Muhamed Çelîkten, Alî Riza Kaya, Sevîm Aydin, Rohelat Aktulum, Îsmet Bor, Hacer Petekkaya, Sewda Uzunkaş, Murad Murxan û Kendal Tosune bi nuşteyanê xo na hûmare de ca girewto. Qilberz Behrî Boztîmur, Mîrza Ciwan, Fatma Çelîktepe û Bawer Xebatî zî bi şîîranê xo ca girewto. Nînan ra Alî Riza Kaya, Sewda Uzunkaş, Kendal Tosun û Qilberz Behrî Boztîmur reya verên a ke nusenê.

Ancî sey hûmaranê verênan xeberî, ferhengek, xaçepers û nameyê nebatan rojname de ca girewto.

Bibîn abone, aboneyan peyda bikîn. Newepel biwanîn, bidîn wendiş.