zazaki.net
22 Oktobre 2017 Yewşeme
Girdîya Karakteran : 12 Punto 14 Punto 16 Punto 18 Punto
16 Temmuze 2013 Sêşeme 16:22

Hûmara 53. ya Newepelî Vejîya

Xebere: Zazakî.Net

Hûmara 53. ya rojnameyê safî bi kirdkî Newepelî bi muhtewayêka dewlemende vejîya.

Roportajê na hûmare Mutlu Canî hunermend Mikaîl Aslanî reyde kerdo. Mikaîl Aslan roportajê xo de derheqê xebata xo ya muzîkî de gelêk melumatan dano la hîna zaf derheqê cuya kurdan û bitaybetî derheqê ziwanî de analîzanê muhîman keno. Mikaîl vano: “… en çîyode xirabin o wo ke jû mordem zonê xo caverde bo. Ma na xirabîye xo rê kerda! Ma zonê xo caverdayo. Ma ke zonê xo de nêbîme haşt na dinya de her çi tal o. Ti nêşikîna, yanî ne hetê xo pirr bikerî, ne manaya heyatê xo pirr bikerî. Tabî peynîya xo se bena, ez nêzaneno hama çik beno wa bibo mayê ke hayig îme, gereke ma çar-panç qatî bigurîme.

Nuşteyê edîtorî yê na hûmare de behsê çend babetanê cîya-cîyayan beno, bitaybetî behsê tayê xeletîyanê şuxulnayîşê ziwanî beno. Nuşteyê Mehemed Çelîktenî ke bi fekê Şankuşî nusîyayo, na hûmare de zî dewam keno.

Na hûmare de Hacer Petekkaya na rey nuşteyêkê ceribnayîşî bi terzêko edebî nuşto. Murad Canşadî derheqê Îmam Hesenê ke dewa Seterî ya Gêxî ra yo de nuşto. Peynîya nuşteyî de yew deyîra ke maya Îmam Hesenî lajê xo ser o vata zî îlawe kerda: “Ax Seter o, Seter o / Natê xo kemer o, dotê xo kemer o / Lajê mi girê do, no bi tîja anmanî ver o”. 

Cemal Aydinî yew sanike arê daya. Bedrîye Topaç, Îdrîs Yazar, Yucel Eşsîzoglu, Nîzamedîn Ozoglu û Îsmetî Borî bi şîîranê xo na hûmare de ca girewto. Nînan ra hunermend Yucel Eşsîzoglu reya verêne Newepel de nuseno. Ancî Dilo Bargiran û Zerîn Azrawa zî her yewî yew fiqra arê daya. Bîlal Zîlanî di kitabî dayê şinasnayene. Ehmedê Dirihî sey her hûmare na hûmare de zî nameyê nebatan weşanayê, Roşan Lezgînî yew kayê ma dayo şinasnayene. Nînan ra teber, xeberî, xaçepers û ferhengekî na hûmare de ca girewto.

Newepel biwanîn, bidîn wendiş.

Newepel, vengê ma kirdan o.

Na xebere 1918 rey wanîyaya
No nuşte hema şîrove nêbîyo.