zazaki.net
16 Tebaxe 2017 Çarşeme
Girdîya Karakteran : 12 Punto 14 Punto 16 Punto 18 Punto
20 Nîsane 2013 Şeme 08:50

Hûmara 50. ya Newepelî Vejîya

Xebere: Zazakî.Net

Hûmara 50. ya rojnameyê safî bi kirdkî Newepelî vejîya.

Nuşteyê edîtorî yê na hûmara de behsê muhtewaya 50 hûmaranê Newepelî beno. Edîtor dano zanayîş ke hetanî nika Newepel de 1081 nuşteyî weşanîyayê û vano: “Nuşteyê ke Newepel de weşanîyayê, ê nuşteyî nîyê ke tena xîtabê roja xo bikerê û çend rojan ra pey qîymetê xo nêmano. Nê nuşteyî qasê ke xîtabê roja xo kenê eynî wext de xîtabê zemanan zî kenê.” Edîtor wina dewam keno: “50 hûmaranê Newepelî de, nuşteyê ke eseran ra neql bîyê ne tede, 133 camêrd 19 cinî tam 152 kesan tede nuşto. Nînan ra qasê 120 kesan reya verêne Newepel de dest bi nuştiş kerdo. Zafê nê nuştoxan ciwan ê, qismêko muhîm êdî daîmî nusenê. Bi seyan kesî zî çarçewaya vilabîyayîşê Newepelî de wendişê kirdkî musayê.” Derheqê profîlê nuştoxan de zî wina vano: “Nuştoxanê ke Newepel de nuşto ra di hebî eslê xo kirdasî yê, ê bînî heme kird ê. Erzingan ra bigîrîn bi Dêrsim û heta bi Gimgim, Motkan ra bigîrîn heta bi Çewlîg, Dîyarbekir, Xarpêt, Ruha, Alduş ra bigîrîn hetanî Puturge û Aqsaray, hema vajîn ke heme cayanê ke tede kirdkî qisey bena ra nuştoxî estê. Hetê bawerîye ra zî, hem elewî hem sunnî yê.”

Roportajê na hûmare Alî Aydin Çîçekî muzîsyen Robarî reyde kerdo. Robar roportaj de behsê serebut û xebata xo ya muzîkî keno û derheqê ziwanî de zî vano “Çîyê ke însan ser o nêvinet, çîyê ke ebe îş nêkerd beno vîndî. Însan tim zere de ronişî ro, rakuyone ravurzone nêzaneno raye ra şoro, qorê însanî nêşonê. Zon jî çîyêde nîyanen o.

Ehmed Kirkanî xebata xo ya mealê Quranî û bi dimilî viraştişê programê radyoyî ser o yew nuşte nuşto. Şukran Arca nuşteyê xo de behsê îcadkerdişê destpêkê sînema kena. Murad Canşadî çekuya “cemre” ser o nuşto. Nîzamedîn Ozoglu hepisxane ra serebutêk tehmê hîkaye de nuşta. Mîrza Ciwanî nuşteyê xo de behsê rewşa Çewlîgî keno. Xetîb Erdogmuş, Dr. Sebahedîn Bor û Hacer Petekkaya zî her yewî yew sanike arêdaya û na hûmara de daya weşanayîş. Şahîn Polatî tayê qeseyê verênan hetê Dêrsimî ra arêdayê. Mehemed Çelîktenî hetê Şankuşî ra yew fiqra arêdaya. Şîîrê na hûmare zî Muhamed Deza Batur û Mutlu Canî nuştê. Newzat Valêrî zî Fuzûlî ra yew xezele tercume kerda. Ancî Fatma Çelîktepe mintiqaya Çêrmûge ra yew kayê qeçan arêdaya. Sey her hûmare, Ehmedê Dirihî ancî nameyê nebatan weşanayê.

Nînan ra teber, gelêk xeberê muhîmî, xaçepers û ferhengek zî na hûmare de ca gênê.

Nuştoxê neweyî yê na hûmare Şukran Arca, Şahîn Polat, Dr. Sebahedîn Bor û Xetîb Erdogmuş ê.

Newepelî biwanîn, bidîn wendiş. Bibîn abone, bidîn ciwînayîş.

Na xebere 1565 rey wanîyaya
No nuşte hema şîrove nêbîyo.