zazaki.net
18 Tebaxe 2017 Îne
Girdîya Karakteran : 12 Punto 14 Punto 16 Punto 18 Punto
17 Çele 2013 Panşeme 00:57

Hûmara 45. ya Newepelî Vejîya

Xebere: Zazakî.Net

Hûmara 45. ya rojnameyê safî bi kirdkî Newepelî vejîya.

Nuşteyê edîtorî de behsê zehmetîya redaktekerdişê nuşteyê nuştoxanê neweyan beno û nuştoxan ra yeno waştiş ke nê usulî ra baş îstîfade bikerê. Edîtor nuşteyê xo de vano:

Rastkerdişê nuşteyan karêko zaf giran o. Û ma zî, seba ke nuştoxê ma xo aver biberê, ma kamcîn herfe rast kenê, ma îşaret kenê. Mesela wina:

Şeklo ke nuştoxî nuşto: Ağe hal xizmikar winen yi û vano : “lela tu qey pawe mi nîvenert tu dapire şi tu qet nîva no ağa mi çira şawen?”

Şeklo ke ma redakte kerdo: Axa halê xizmetkarî vîneno û vano: “la ti qey pawe mi nêvindertî to da piro şî, to qet nêva no axa mi çira şaweno?”

Seke aseno, kamcîn herfe yan çekuya ke ma rast kenê ma hem bold kenê hem zî sûr kenê. Nuştoxan rê apey şawenê ke xeletîyanê xo bivînî, reyna hîna rast binusê. La zafê nuştoxan xo rê sey henekî vînenê, goş nêdanê nê ezîyetê ma. Oxro ke no ezîyetêko bêhed o, nêno vatiş. Belkî no ezîyet zî mucadeleyêk heme mucadeleyan ra zehmetêr o. La ne kes pê zano ne zî qîymetê xo esto.

Tîya de hêvîya ma na ya ke xort û kênayê ma yê ke dest bi nuştiş kenê nê ezîyetê ma ra baş îstîfade bikerê. Şeklo ke înan nuşto û şeklo ke ma redakte kerdo, bidê têver û bi dîqet bala xo bidê ser, rayîrê musayîş û rastnuştişê kirdkî de sey derse bivînê. Çunke her game firsendêko winasî nêkeweno dest yan zî kesêk ke werzo her game wina ziwanî ser o bixebitîyo çin bo.

Wa xelet fehm nêbo. Hetêk ra, seba ke wa bêro zanayîş ke ma çiqas zehmetê ziwanî ancenê hetêk ra zî wa bizanîyo ke ma çiqas bicidîyet karê xo kenê, coka ma behs kenê.

Na hûmare de nuşte û eserê hepsîyan bale ancenê. Murad Canşad, Huseyîn Karakaş û Sînan Sutpakî zindanan ra nuşte û hîkayeyî şawitê.

Nuştoxanê cinîyan ra Bedrîye Topaç, Sevîm Aydin, Hacer Petekkaya û Zerîn Azrawa nuşte û şîîrê xo dayê weşanayene. J. Îhsan Espar, Adir Dêrsimij û Muhamed Deza Baturî zî bi şîîranê xo rojname de ca girewto. Ancî Rohelat Aktulum, Mîrza Ciwan û Mistefa Gomayijî zî bi nuşteyanê xo rojname de ca girewto.

Sey hûmaranê verênan na hûmare de zî yew deyîra notaya xo hetê muzîsyen Mucahîd Gokerî ra amade bîya û nameyê nebatan ke hetê Ehmedê Dirihî ra amade benê rojname de ca girewto.

Sey hûmaranê verênan na hûmare de zî gelek xeberê muhîmî û xaçepers zî esto.

Newepel biwanîn, bidîn wendiş; bibîn abone, bidîn ciwînayîş.

Newepel veng û rengê ma kirdan o. Newepel garantîya ciwînayîşê kirdkî yo.

Na xebere 1636 rey wanîyaya
No nuşte hema şîrove nêbîyo.