zazaki.net
21 Teşrîne 2017 Sêşeme
Girdîya Karakteran : 12 Punto 14 Punto 16 Punto 18 Punto
17 Gulane 2012 Panşeme 10:47

Hûmara 29. ya Newepelî Vejîya

Xebere:Zazakî.Net

Hûmara 29. ya rojnameyê Newepelî bi muhtewayêka dewlemende vejîya.

Roportajê na hûmare Seyîdxan Kurij û Mehmed Selîmî deyrîrbazê mintiqaya Paliyî Zaza Nûroyî reyde kerdo. Zaza Nûro hetê Çewlîg û Paliyî de deyîrbazêko namdar o. Zaza Nûro roportajê xo de vano “Merdim ki xwi mesinasno, nîye dînê xwi û nîye zî Homayê xwi sinasneno.

Nuşteyê edîtorî de behsê aktîvîteteyanê sey festîval, rojê edebîyatî, kongreyê ziwanî ûsn. ke nê serranê peyênan de mîyanê ma kurdan de zaf benê, yeno kerdiş. Edîtor vano: “Aktîvîteyê qelebalixê winasî ke xo ra pey çîyê nêverdanê, sey kefê sabunî benê vindî şinê ney, esas, musabeqeyê bixelatî kulturî gane kenê, dînamîzm dekenê mîyanê miletî. (…) Musabeqeyê ke wayîrê xelatêka madî ya cidî yê, seba ke raste-rast xuliqnayoxanê hunerî teşwîq kenê, coka musabeqeyî bingeh ra benê zemînê hesilnayîşê eseranê hunerîyan. Eke tena yew dezgeyê kurdan, bi butçeyêka mutewazî warê hunerî de musabeqeyan organîze bikero, do her musabeqa de bi seyan eserê muhîmî bêrê pêser. Xora a game merasîmê xelatdayîşî bi xo zî do bibo aktîvîteyêko heqîqî û muhîm.

Bîlal Zîlanî derheqê sempozyumê ke hetê Unîversîteya Çewlîgî ra virazîyabî de yew xebere amade kerda. Xebere de wina vano: “Alî Kayayî zî qiseykerdişê xo de teorîya Deylemî tekrar kerde û îdîa kerd ke ‘Kurdî zazayan asîmîle kenî.’ Na qiseya Alî Kayayî ra dima tayê wendekaran Kaya protesto kerd û salone terekna. Tayênan zî sey cewabî va ‘Madem kurdan to asîmîle kerdo, ti çira tirkî qisey kenî?’ Û reaksîyonê xo nîşan da. Munaqeşeyê kokê zazayan ra teber eşkera yo ke kurdê zaza û kurmancî pîya hetê tirkan ra asîmîle benê. Labelê wina aseno ke tayê hêzî yan zî kesî wazenê ke her di grûbanê kurdan; kurmancan û zazayan sey reqîban bîyarê têver!

Nuştoxanê cinîyan ra Zerîn Azrawa û Bedrîye Topaç di nuşteyê erjîyayeyî nuştê. Wendekarêk bi nameyê Hesen Alkişî hepisxane ra mektube nuşta ke derheqê muhîmîya Newepelî de fikr û hîsanê xo îfade keno. Mujdat Gîzlîgolî roja dayîkan û roşanê ziwanê kurdkî ser o yew nuşte nuşto. Esad Namdarî derheqê fealîyetê çarnayîşî û averşîyayîşê ziwanî de rolê çarnayîşî ser o yew analîz nuşto. Ancî Rohelat Aktulum û Zerrweş Xodî her yewî yew nuşte nuşto. Ciwan Sutpak, M. Arif Ayçiçek û Adir Dêrsimijî zî şîîrî nuştê.

Gelek xeberanê muhîman, xaçepers û nameyê vilan ra teber na hûmara Newepelî de yew koşe zî bi nameyê “Kayê Ma” abîyo. Kayo verên “Çildane” (atlama) ya. Wina aseno ke do na hûmare ra pey her hûmare de kayanê ma ra yew nimûne rojname de ca bigîro. Her wendox eşkeno mintiqaya xo ra yew kay binuso û rojnameyî rê bişawo. Bi no qayde kulturê ma vejîyo meydan û çinbîyene ra bireyo.

Heto bîn ra hewceyîya Newepelî bi aboneyan û ardim esto. Şarê ma nê hetî ra hesasîyetê xo nîşan bido seba domnayîşê weşana Newepelî zaf baş beno.

Na xebere 1870 rey wanîyaya
No nuşte hema şîrove nêbîyo.