Ehmedê Kurdî

Seyyid Ahmed el-Kürdî (1830-1921) xelîfeyanê Şêx Alî Septî ra yew o, yew şêxê Neqşîbendî yo. Bi nameyanê Ahmed el-Kürdî el-Hüseynî û Seyyid Ahmed Çabakçuri el-Kürdî zî yeno şinasnayiş. Nameyê pîyê ey Mihemed Şemsedîn o. Serra 1830 (Hîcrî 1246) de dewa Çewlîgî Kur (bi Tirkî Dikme) de ameyo dinya. O wext Çewlîg hema qeza ya û bi nameyê Çabakçur girêdayeyê Bidlîsî yo. Şarê dewa Kurî o wext zî nika zî Kirdî yanî Zazakî qalî kenê. Ziwanê dayike yê Ahmed el-Kürdî zî Zazakî yo. La seke aseno xwu ra vano “Ahmed el-Kurdî” yanî “Ehmedê Kurdî.”

Diyes serrîya xwu ra dima şino Pali û Şêx Elî Sebtî ra (merg 1871) îlim tehsîl keno, badê zî întisabê ey keno. Şêx Elî Sebtî ra îcazetê îlmî û xîlafetê terîqetê Neqşîbendî-Xalîdî gêno. Şêx Elî Sebtî, xelîfeyanê Mewlana Xalidê Şehrezûrî el-Kurdî ra yew o, bawkalê Şêx Seîd Efendî yo.

Wefatê Şêx Elî Sebtî ra dima midetêk Pali de maneno la serra 1892 de şino Xarpêt û uca dest bi fealîyetanê îrşadî keno. Çares serrî Xarpêt de maneno. Dima serra 1906 de şino Sêwreke û heşt serrî uca meneno. Di serrî zî Wêranşar de maneno. 1915 de reyna ageyreno Xarpêt û heta wefatê xwu uca maneno. 25 Tişrîno Peyîn 1921 de Xarpêt de şino rehmet. Mezelê ey bexçeyê Camî Kebîrê Xarpêtî (Harput Ulu Camii) de yo.

Seyîd Ahmed el-Kürdî xelîfetî nêdaya zaf kesan. La xelîfeyanê ey ra tewr meşhûr Kastamonu ra Hattatzade Muhemmed İhsan Oğuz o. Ey derheqê şêxê xwu Ahmed el-Kürdî de bi nameyê "İki Gavs-i Enâm: Şeyh Ali Es-Sebti & Seyyid Ahmed El-Kürdî" yew eser nuşto.

______

Çimeyî

- Hattatzâde Muhammed İhsan [Oğuz], İki Gavs-i Enâm: Şeyh Ali Es-Sebti & Seyyid Ahmed El-Kürdî, Necm-i İstikbâl Matbaası, İstanbul, 1342 (1926), r. 22 ve r. 26-30

- İshak Sunguroğlu, "Seyyid Ahmedülkürdî", Harput Yollarında, 2. Cilt, İstanbul 1959, r. 143-145

- Rahîm Er, "Sohbet-Vasiyetname", Türkiye, 29.06.1998 ra neql: Türktakvim sitesi. (erişim: 21.04.2021)

- Bekir Köle, "Seyyid Ahmed Çapakçûrî’nin Müridi Muhammed İhsan Oğuz’a Gönderdiği İrşâd Mektupları", Dicle Üniversitesi İlahiyat Fakültesi Dergisi, c. 17, h. 2, 2015, rr.79-83

- Ramazan Muslu, "Bingöllü Bir Hâlidî Şeyhi: Şeyh Ahmed Çabakçûrî (1830-1921)", 1. Bingöl Sempozyumu, Bingöl 10-11 Haziran 2006, (Kitap Baskısı: Bingöl Tarih ve Kültür Araştırmaları Dergisi Yayınları, Şubat 2007) rr. 125-137.

- Günerkan Aydoğmuş, Harput Kültüründe Din Alimleri, ELESKAV Yay., Elazığ 1998, r. 174-175