HÎRÊ KITABÊ TUTAN

Hîrê kitabê ma yê tutan şî metbea. Her hîrê kitabî zî hîkayeyê zaf rindek û pedagojîk ê. Her hetî ra bi yew hawayo zaf baş amade biyê. Înşelah yew demo nizdî de do metbea ra bivejîyê û hevalê ma yê ercayeyî zî biberê mekteban de tutanê ke dersa Zazakî weçînaya rê bikerê dîyarî.

Amadebiyayişê enê kitaban wina bi. Emser aşma gulanî de Erxenî de fuara kitaban organîze biye. Ez zî beşdar bibiya. Fuare de gelek kesan dir nizdî ra têkilîya ma biye. Mesela, rojêk yew xanima delale ameye standê ma û hîrê kitabê tutan mi rê dîyarî kerdî. Kitabî bi Kurmancî bî: DOKTOR JÎJO-1, DOKTOR JÎJO-2 û DOKTOR JÎJO-3

Kitabî hetê Weşanên Na ra Îzmîr de weşaniyayê. Kitaban de rêzehîkayeyî xestexane de vîyarenê. Nuştoxa hîkayeyan Sîya Sîtav a. Merve Tunç û Esma Ak resimî viraştê. Psîkolog Haydar Alper Eserî zî hetê pedagojî ra kontrol kerdê. Seba ke hîkayeyî zaf bi weşê mi şiyî coka mi her hîrê kitabî zî tadayî Zazakîya ma ser û dosyayî Weşanên Na rê şirawitî: DOKTOR DIJE-1, DOKTOR DIJE-2 û DOKTOR DIJE-3

Eno payîz kek Sidqî va “Eger to dest de hîkayeyê tutan estê, ma emser mekteban de tutanê ke dersa Zazakî weçînaya rê kitabanê hîkayeyan dîyarî bikerê.” Kek Sidqî, par zî çapo diyin yê Ferhengê Zazakî-Tirkî ke mi amade kerdo mekteban de vila kerdbi. Ma hezar nusxayî çap kerdbî, qedîyayî. Nika ez amadekarîya çapê hîrêyin kena. Helbet her çapkerdiş de ez ferhengî hîra kena. Par 45 hezarî lîra mesrefê metbea yê ferhengî kek Sidqî çarçewaya xebata komeleya ZIWAN-KOMî de arêdaybî. Amadekerdişê ferhengî û xebatê bînî xwura ma keremê zerrîya xwu ra kenê.

Mesrefê metbea yê enê her hîrê kitaban ancî kek Sidqî amade kerd. Enê mesrefî ra qismêk, ez zana, merdimê dildarî ke wayirê hesasîyetê mîlî yê da. Çiyo ke mi dî, yewî 10 hezarî, tayê kesan 5 hezarî, tayêne 2 hezarî, tayêne 1 hezar, hetta, mi dî yew xortê wendekarî 210 lîrayî şirawitbî. Keyeyê hemîne awan bo. Axirî, seba ke enê her hîrê kitabî rengîn ê, kaxidê înan zî vayî yo, coka mesrefê metbea zêde yo. Îlaweten heqê kargoyî û mesrefê vilakerdişî zî esto. Karê bînî, yanî nuştişê hîkayeyan, viraştişê resiman, tadayiş, mîzanpaj û sewbîna karî hevalan keremê zerrîya xwu ra kerdê. Destê hemîne tern bo.

Her kes eşkeno texmîn bikero, ziwano ke tutî pê qisey nêkerê, îstîqbalê ê ziwanî çinê yo. Coka xebatê ziwanî ke xîtabê tutan kenê, zaf û zaf muhîm ê; hela mevajê ke semedê Zazakîya ma heyatî yê. Û ziwan, meselaya me ya sereke ya milî ya. Xebatê ke semedê ziwanî benê -helbet xebatê raştî- xizmetê nasnameyê ma yê milî kenê. Ez hêvîdar a ke her kes herinda xwu de beşdarê enê hawa xebatan bibo û paştgîrî de texsîr nêkero. Çimkî dewlete xebatanê winasî de ardim nêkena, hereketê ma yê siyasî zî meselaya ziwanî de zaf sist ê. Coka enê xebatî milê dînamîkanê sivîlan de manenê, barê paştîya ferdanê wayirê hesasîyetî yo.

Ez nameyê miletê ma ser o înanê ke ena xebate de kede daya û ardim kerdo rê yew bi yew zaf sipas kena.

Sîya Sîtav, Doktor Dije-1, Kurmancî ra tadayiş: Roşan Lezgîn, Weşanên Na, Îzmîr 2025, 36 rîpelî

Sîya Sîtav, Doktor Dije-2, Kurmancî ra tadayiş: Roşan Lezgîn, Weşanên Na, Îzmîr 2025, 36 rîpelî

Sîya Sîtav, Doktor Dije-3, Kurmancî ra tadayiş: Roşan Lezgîn, Weşanên Na, Îzmîr 2025, 36 rîpelî