Hûmara 26. ya Newepelî Vejîya

Hûmara 26. ya rojnameyê safî bi kirdkî Newepelî vejîya.

Nuşteyê edîtorî yê na hûmare de polîtîkaya dewlete ya vera kurdan de analîz bena û dima zî behsê viraştişê qanûnê bingehînî yê neweyî beno. Edîtor nuşteyê xo de vano:

“Qanûnê bingehîn yê Îraqî de yeno vatiş ke erebkî û kurdkî ziwanê resmî yê pêroyî, tirkmankî û suryankî zî ziwanê resmî yê mintiqayî yê. Naye ra teber, fiqraya pancine ya madeya çarine ya qanûnê bingehîn yê Îraqî wina vana: ‘Eke yew mintiqa yan zî wîlayetêk de netîceyê referandumî de hetê zafaneyê şarî ra qebul bibo, ziwanê mehelî îlaweten sey ziwanê resmî yeno dîyarkerdiş.’

Ganî kurdî heme têreyra nê prosesî de bi heme hêzê xo israr bikerê ke qanûnê bingehînî yê neweyî de xo bidê terîfkerdiş (tanımlanma). Eke ney, no sîstemê tirkan ke nika her di hêzanê înan yê bingehînan, yanî kemalîstan û neo-osmanîstan pêkerdo, do makyajê xo teze bikerê û tewr tay çend des serranê bînan wina dewam bikerê, hetanî ke ma kurdî temamen mîyan ra bihelîyîn; ziwan, kultur û estena ma bin ra vîndî bibo!”

Na hûmare de roportajo ke Seyîdxan Kurijî dengbêj Rêzan Rezdarî reyde kerdo weşanîyayo. Rêzan Rezdar roportajê xo de vano “Miletê ma zona, ez semêd meseleyê neteweyî ya kota ini rîyer. Her deyîrê mi d’ xilaseyê welatî ma, Kurdiston û neteweyê ma esta.”

Şeyda Asmîn bi nameyê “Pêraran de Hona Pîyazan Zîl Dayêne” hîkayeyêka balkêşe nuşta. Yaşar Balukenî serebutêkê xo tehmê edebîyatî de zaf rindek nuşta. Hem cuya Çewlîgî ra fotografêk nîşan dano hem zî xususîyetêkê xuyê merdiman nawneno. Doxan Karasu, cuya klasîke û cuya moderne ya şarê ma muqayese kerdê, behsê edetanê verênan û nikayênan keno. Ednan Bermazî derheqê qetlîamê xortanê kurdan ke dewa Qilabanî Roboskê de qetl bibî de yew nuşte nuşto. Îrfan Sîmserkîsijî yew meselaya foklorîke nuşta.

Adir Tilistoneyî bi nameyê “Zengelonya”, Rohelat Aktulumî bi nameyê “Azadî” û Xeyrî Yaşarî zî bi nameyê “Qezencê Leteyêk Nanî” şîîrî nuştê. Mistefa Gomayijî vateyê verênan û îdyomî arê dayê.

Nînan ra teber zî gelek xeberê muhîmî rojname de weşanîyayê.